டிவியில் விஜயகாந்த் படம்-தடை கோரும் வி.சிறுத்தைகள்

கடலூர்: நாடாளுமன்ற தேர்தல் நடக்கவுள்ள நிலையில் தொலைக்காட்சிகளில் விஜயகாந்த் நடித்த படங்களை ஒளிபரப்பு செய்ய தடை விதிக்க வேண்டும் என்று விடுதலை சிறுத்தைகள் கோரிக்கை விடுத்துள்ளனர்.

கடலூர் மாவட்டம் பெண்ணாடம் நகர மற்றும் நல்லூர் ஒன்றிய விடுதலை சிறுத்தைகள் கட்சியின் ஆலோசனைக் கூட்டம் பெண்ணாடம் தொல்காப்பியர் அரங்கத்தில் நடைபெற்றது.

இந்த கூட்டத்தில்,

விடுதலை சிறுத்தைகள் கட்சி தலைவர் திருமாவளவன் ஆணையை ஏற்று 40 தொகுதிகளிலும் ஐக்கிய முற்போக்கு கூட்டணி வேட்பாளர்களின் வெற்றிக்கு பாடுபடுவோம்.

அரசியல் கட்சிகளின் சார்பில் தயாரிக்கப்படும் டிஜிட்டல் பேனர், படம் போன்றவைகளுக்கு தேர்தல் ஆணையம் தடை விதித்துள்ளது.

இதனால், சிவகாசியில் இருந்து தயாரித்து தமிழகமெங்கும் விற்பனை செய்யப்படும் தீப்பெட்டிகளில் விஜயகாந்தின் படம் உள்ளது. அதனை உடனடியாக தடை செய்ய வேண்டும்.

மக்களவை தேர்தல் முடியும் வரை விஜயகாந்த் நடித்த சினிமா படத்தை டிவியில் போடுவதற்கு தேர்தல் ஆணையம் தடை விதிக்க வேண்டும் என தீர்மானம் நிறைவேற்றப்பட்டது.