சேலம்-செம்மலையை தாக்கு பிடிப்பாரா தங்கபாலு?

சேலம்: 2 முறை எம்பி., ஒரு முறை மத்திய இணையமைச்சர் என பதவி வகித்துள்ள, தமிழக காஙகிரஸ் தலைவர் தங்கபாலு சேலத்தில் மீண்டும் போட்டியிடுகிறார்.

தங்கபாலுவின் தந்தை பெயர் தங்கவேலு. தாயார் முத்தம்மாள். சேலம் மாவட்டம் குறிச்சி கிராமத்தைச் சேர்ந்தவர். 1950ம் ஆண்டு பிறந்தார்.

மனைவி பெயர் ஜெயந்தி. ஒரு மகன், ஒரு மகள் உள்ளனர். ராஞ்சி பல்கலைக்கழகத்தில் எம்.ஏ. பட்டம் பெற்றுள்ளார்.

1991ம் ஆண்டு தர்மபுரி தொகுதியிலும், 2004ம் ஆண்டு சேலம் தொகுதியிலும் போட்டியிட்டு எம்.பி. ஆகியுள்ளார்.

1969ம் ஆண்டு காங்கிரஸில் இணைந்தார். அப்போது வட்ட இளைஞர் காங்கிரஸ் தலைவராக தேர்ந்தெடுக்கப்பட்டார். படிப்படியாக உயர்ந்து, 1981ம் ஆண்டு இளைஞர் காங்கிரஸ் தலைவராகவும், 1984ம் ஆண்டு ராஜ்யசபா உறுப்பினராகவும், 1990ம் ஆண்டு தமிழக காங்கிரஸ் துணைத் தலைவராகவும், 1997 முதல் 98 வரை தமிழக காங்கிரஸ் தலைவராகவும் பதவி வகித்தார்.

1993ம் ஆண்டு முதல் 96 வரை மத்திய இணை அமைச்சராக இருந்தார். கடந்த ஆண்டு மீண்டும் காங்கிரஸ் தலைவராக பதவியேற்றார்.

பல்வேறு கல்வி நிறுவனங்களையும் நடத்தி வரும் தங்கபாலு தற்போது சேலம் தொகுதியில் பலம் வாய்ந்த அதிமுகவின் செம்மலையை எதிர்த்து நிற்கிறார்.

தங்கபாலுவுக்கே சீட் கிடைக்க விடாமல் ஒரு கோஷ்டி கடுமையாக முயன்றது. அதை மீறி சீட் பெற்றுள்ளார் தங்கபாலு.