நியூயார்க் டைம்ஸ்: நஷ்டம் மேலும் அதிகரிப்பு!

நியூயார்க்: விளம்பர வருவாய் குறைந்துவிட்டதால் மீண்டும் பெருமளவு நஷ்டத்தைச் சந்தித்துள்ளது நியூயார்க் டைம்ஸ் நிறுவனம்.

அமெரிக்காவின் புகழ்பெற்ற நியூயார்க் டைம்ஸ் மற்றும் பாஸ்டன் குளோப் பத்திரிகைகளை நடத்தி வரும் இந்த நிறுவனம், முதல் காலாண்டில் தனது விளம்பர வருவாய் 27 சதவிகிதம் குறைந்துவிட்டதாகக் கூறியுள்ளது.

இந்தக் காலகட்டத்தில் மட்டும் 73 மில்லியன் டாலர் அளவுக்கு வருவாய் குறைந்துள்ளதாம். கடந்த ஆண்டு 35 மில்லியன் டாலர் அளவுக்கு மட்டுமே இந்த நஷ்டம் இருந்தது.

இந்த ஆண்டின் மொத்த நஷ்டம் மட்டும் 609 மில்லியன் டாலர்கள். விளம்பரங்களைப் பெறுவது மிகுந்த சிரமமான காரியமாகிவிட்டதால், இனி வருவாய்க்கான மாற்று வழிகளை ஆராய்வதாக இந்த நிறுவனம் அறிவித்துள்ளது.

இந்நிறுவனத்தின் வெப்சைட் வருமானமும் வெகுவாகக் குறைந்துள்ளது. இதில் மட்டுமே முதல் காலாண்டில் 5.6 சதவிகிதம் வருவாய் குறைந்துள்ளது.

இதனால் மேலும் சிக்கன நடவடிக்கையில் இறங்கப் போவதாக நியூயார்க் டைம்ஸ் அறிவித்துள்ளது.