அதிமுகவில் அதிக மதவாதம்-காதர் மொய்தீன்

விருத்தாசலம்: பாஜகவைவிட அதிமுகவில் தான் மதவாதம் அதிகமாக உள்ளது என்று இந்திய யூனியன் முஸ்லிம் லீக் மாநிலத் தலைவர் காதர் மொகிதீன் கூறினார்.

விருத்தாசலத்தை அடுத்த மங்கலம்பேட்டையில் காங்கிரஸ் வேட்பாளர் கே.எஸ். அழகிரியை ஆதரித்து நடந்த பிரசாரக் கூட்டத்தில் பேசிய அவர்,

சேது சமுத்திரத் திட்டம், கடல் நீரை குடிநீராக்கும் திட்டம், நதிகள் இணைப்புப் திட்டம், பெரிய பாலங்கள், தொழிற்சாலைகள் உருவாக்கம், தகவல் தொழில்நுட்ப துறையில் முதலீடுகள் என தமிழகத்தில் கடந்த 5 ஆண்டு காலத்திற்குள் 330 திட்டங்களை ஜனநாயக முற்போக்கு கூட்டணி அரசு நிறைவேற்றி உள்ளது.

உலக வரலாற்றில் இந்தியாவின் பெருமையை நிலைநாட்டியவர் மன்மோகன் சிங். சிறந்த பொருளாதார வல்லுநரான அவர் நமக்கு பிரதமராகக் கிடைத்தது இந்திய மக்கள் செய்த புண்ணியம் என்று அமெரிக்க அதிபர் ஒபாமாவே சொல்கிறார்.

உலக நாடுகளின் பொருளாதார கப்பல்கள் தத்தளித்து கவிழ்ந்து கொண்டிருக்கிற இந்த சூழ்நிலையில், இந்தியப் பொருளாதாரம் தனது லட்சியத்தை நோக்கி அமைதியாக சென்று கொண்டிருக்கிறது.

பிரதரமாகத் தூடிக்கும் அத்வானிக்கு தமிழ்நாட்டில் ஒரு சதவீதம் கூட ஆதரவு கிடையாது. பாஜகவைவிட அதிமுகவில் தான் மதவாதம் அதிகமாக உள்ளது.

திமுக கூட்டணி இயற்கையான கூட்டணி. சமூக நல்லிணக்க கூட்டணி என்றார்.