'அமெரிக்க நிறுவனங்கள் பின்தங்கிவிடும்!' - பிரைஸ்வாட்டர்ஹவுஸ் கூப்பர்

டெல்லி: அவுட்சேர்ஸிங் தொடர்பாக அமெரிக்க அதிபர் ஒபாமாவின் புதிய கொள்கை பல்வேறு துறைகளில் கடும் விளைவுகளை ஏற்படுத்தத் தொடங்கிவிட்டது.

மருந்துப் பொருள் தயாரிப்புத் துறையில் பெரும் பின்னடைவுக்கு இந்தக் கொள்கை காரணமாகிவிடும் என ஏற்கெனவே அமெரிக்க நிறுவனங்களே குறைகூறியுள்ளன.

இந் நிலையில், பிரைஸ்வாட்டார் ஹவுஸ் கூப்பர் நிறுவனம் ஒபாமாவின் அறிவிப்பை விமர்சித்துள்ளது. ஒபாமா சொல்வதை அமெரிக்க காங்கிரஸ் அமல்படுத்தினால், சர்வதேச அளவில் அமெரிக்க நிறுவனங்களின் போட்டித் தன்மை குறைந்துவிடும் அபாயம் உள்ளது என அந்நிறுவனம் கூறியுள்ளது.

இந்தியாவிலிருந்து வேலைக்கு ஆட்களை எடுக்கக் கூடாது என ஒபாமா அறிக்கை நேரடியாக வலியுறுத்துவதால், நிச்சயம் பெங்களூரு அல்லது சென்னையை மையமாகக் கொண்டு இயங்கும் அமெரிக்க நிறுவனங்கள் கூடுதலாக வரி செலுத்த வேண்டி வரும். கிட்டத்தட்ட 50 சதவிகித வருவாய் இழப்பை தாங்க எந்த நிறுவனமும் முன்வராது. ஆனால் அமெரிக்காவில் தகுதி வாய்ந்த பணியாளர் இல்லாமல், உற்பத்தி பாதிக்கப்பட்டால், அதன் இழப்பு, அமெரிக்க அரசு தரும் வரிச்சலுகையை விட பல மடங்கு அதிகமாக இருக்கும். இதை வெள்ளை மாளிகை புரிந்து கொள்ள வேண்டும், என இந்த நிறுவனம் கூறியுள்ளது.

ராமலிங்க ராஜுவின் மோசடிகளால் பெரும் சிக்கலைச் சந்தித்த சத்யம் நிறுவன கணக்குகளை அதிகாரப் பூர்வமாக தணிக்கை செய்துவந்தது இந்த பிரைஸ்வாட்டர்ஹவுஸ் கூப்பர்தான். இதன் இரு முக்கிய அதிகாரிகள் இப்போது சிறையில் உள்ளது குறிப்பிடத்தக்கது.