ஒரு வழியாய்..,வருகிறார் சோனியா-கருணாநிதியுடன் பொதுக் கூட்டம்

சென்னை: திமுகவுடனான கூட்டு பிரச்சாரக் கூட்டம் ரத்து செய்யப்பட்டதாலும், அதிமுகவுடன் கூட்டணி அமைப்போம் என்று ராகுல் காந்தி உள்ளிட்டோர் பேச ஆரம்பித்துள்ளதாலும் காங்கிரஸ்-திமுக இடையே உரசல் தீவிரமாகியுள்ளது. இந் நிலையில் மீண்டும் 10ம் தேதி சென்னையில் சோனியா காந்தியின் பிரசாரக் கூட்டத்துக்கு ஏற்பாடு செய்யப்பட்டுள்ளது. அதில் முதல்வர் கருணாநிதியும் பங்கேற்பார் என அறிவிக்கப்பட்டுள்ளது.

வரும் திங்கள்கிழமையுடன் தமிழக தேர்தல் பிரசாரம் ஓயும் நிலையில் ஞாயிற்றுக்கிழமை இந்தக் கூட்டத்துக்கு ஏற்பாடு செய்யப்பட்டுள்ளது.

ராகுலுக்கு திமுக எதிர்ப்பு...

முன்னதாக ராகுல் கருத்து குறித்து கருத்து தெரிவித்த திமுக, நாங்கள் சோனியாவின் பேச்சைத் தான் மதிப்போம். ராகுலின் பேச்சை அல்ல என காட்டமாகக் கூறியது. அத்தோடு கூட்டணி விஷயமாக காங்கிரஸ் தலைவர்களின் பேச்சு குறித்து சோனியாவிடம் முதல்வர் கருணாநிதி தொலைபேசியில் வருத்தம் தெரிவித்ததாகவும் கூறப்படுகிறது.

இந் நிலையில் மீண்டும் சோனியாவும் கருணாநிதியும் பங்கேற்கும் கூட்டத்துக்கு ஏற்பாடு செய்யப்பட்டுள்ளது.

சோனியா காந்தி 10ம் தேதி மாலை சென்னை வருகிறார். வந்தவுடன் முதல்வரை மருத்துவமனையில் சந்திக்கிறார். பின்னர் அங்கிருந்து முதல்வரும், சோனியாவும், தீவுத் திடலுக்கு வருகிறார்கள்.

அங்கு நடைபெறும் பொதுக் கூட்டத்தில் கலந்து கொள்கிறார். பின்னர் அவர் டெல்லி கிளம்பிச் செல்கிறார் என காங்கிரஸ் வட்டாரங்கள் தெரிவித்தன.

அதே நேரத்தில் சோனியா புதுச்சேரிக்கு செல்வாரா, இல்லையா என்பது தெரியவில்லை.

இன்று சிவகங்கையில் ராகுல்....

சோனியாவின் புதல்வர் ராகுல் காந்தி இன்று சிவகங்கை, திருச்சியில் பிரசாரம் மேற்கொண்டு பேசுகிறார்.

இன்று பிற்பகல் 2 மணிக்கு அவர் தனி விமானம் மூலம் மதுரை செல்கிறார். அங்கிருந்து ஹெலிகாப்டரில் சிவகங்கை செல்லும் ராகுல், ப.சிதம்பரத்தை ஆதரித்துப் பேசுகிறார்.

பின்னர் ஹெலிகாப்டர் மூலம் திருச்சி சென்று மாலையில் காங்கிரஸ் வேட்பாளர் சாருபாலா தொண்டமானை ஆதரித்துப் பேசுகிறார்.

இதே மேடையில் பெரம்பலூர் திமுக வேட்பாளர் நடிகர் நெப்போலியன், கரூர் திமுக வேட்பாளர் கே.சி.பழனிச்சாமி ஆகியோரையும் ஆதரித்துப் பேசுகிறார்.

ராகுல் காந்தி வருகையையொட்டி இரு ஊர்களிலும் பலத்த பாதுகாப்புக்கு ஏற்பாடு செய்யப்பட்டுள்ளது. ராகுல் காந்திக்காக குண்டு துளைக்காத கார் டெல்லியிலிருந்து வந்துள்ளது. குண்டு துளைக்காத மேடைகளும் அமைக்கப்பட்டுள்ளன.

நாளையே முதல்வர் வீடு திரும்புவார்?:

இதற்கிடையே முதல்வர் கருணாநிதி காய்ச்சல் குறைந்து நலத்துடன் இருப்பதால் நாளையே அவர் வீடு திரும்பலாம் என மருத்துவமனை வட்டாரங்கள் தெரிவிக்கின்றன.