மதுரை அருகே நடந்த கோர சாலை விபத்தில் 15 பேர் பலி

மதுரை: மதுரை அருகே பெருங்குடியில், தனியார் பஸ்சும், சரக்கு ஆட்டோவும் பயங்கரமாக மோதிக் கொண்ட விபத்தி்ல 15 பேர் பரிதாபமாக உயிரிழந்தனர்.

விருதுநகரைச் சேர்ந்த 20க்கும் மேற்பட்ட கொத்தனார், சித்தாள்கள், மதுரையில் கட்டட வேலைக்காக மினி சரக்கு ஆட்டோ ஒன்றில் வந்து கொண்டிருந்தனர்.

மதுரை பெருங்குடி அருகே உள்ள பரம்புப்பட்டி என்ற கிராமத்திற்கு அருகே அவர்களது ஆட்டோ வந்து கொண்டிருந்தபோது, எதிரே வந்த தனியார் பேருந்துடன் பயங்கரமாக மோதியது.

இந்த கோர விபத்தில் ஆட்டோ அப்படியே அப்பளம் போல நொறுங்கியது. அதில் பயணித்தவர்களில் 15 பேர் சம்பவ இடத்திலேயே பரிதாபமாக உயிரிழந்தனர்.

இவர்களில் 7 பேர் பெண்கள் ஆவர். மற்றவர்கள் ஆண்கள். ஆட்டோவில் வந்த 8 பேரும், பஸ்சில் இருந்த சிலரும் காயமடைந்தனர்.

காயமடைந்தவர்கள் அனைவரும் அரசு ராஜாஜி மருத்துவமனையில் அனுமதிக்கப்பட்டுள்ளனர்.

இந்த கோர விபத்தைத் தொடர்ந்து அந்தப் பகுதியில் சில நிமிடங்களுக்கு போக்குவரத்து பாதிக்கப்பட்டது.