பிபிஓ வேலை வாய்ப்பு-22% குறைந்தது
டெல்லி: இந்திய பிபிஓக்களில் 22 சதவீத வேலைவாய்ப்பு குறைந்துள்ளதாக நெளக்ரி இணையத் தளம் தெரிவித்துள்ளது.
உலக பொருளாதார மந்தம் தகவல் தொழில்நுட்பம் மற்றும் அதை சார்ந்த நிறுவனங்களை ஆட்டி படைத்து வருகிறது. இந்தியாவில் வேலைவய்ப்புகள் இந்த ஆண்டு மார்ச் மாதத்தில் 9 சதவீதம் குறைந்துள்ளது. ஏப்ரல் மாதத்தில் அது மேலும் 4.7 சதவீதம் குறைந்துள்ளது.
இதில் அதிகம் பாதிக்கப்பட்டது பிபிஓ மற்றும் தகவல் தொழில்நுட்பம் தொடர்பான வேலைவாய்ப்புகள் தான்.
இது குறித்து நெளக்ரி இணையத் தளம் வெளியிட்டுள்ள செய்தியில்,
இந்தத் துறைகளில் புதிய வேலைவாய்ப்பு உருவாவது 22 சதவீதம் குறைந்துள்ளது. அதே நேரத்தில் வங்கிகள் மற்றும் நிதி நிறுவனங்களில் புதிய வேலைவாய்ப்பு 4 சதவீதம் அதிகரித்துள்ளது.
இது குறித்து அந்த நிறுவனத்தின் தலைமை செயல் அதிகாரி ஹிதேஷ் ஓபராய் கூறுகையி்ல், கடந்த காலங்களிலும் ஏப்ரல் மற்றும் மே மாதத்தில் எங்கள் நிறுவனம் இது போன்று வேலை வாய்ப்பில் சிறிய சரிவை சந்தித்துள்ளது.
நிறுவனங்கள் இந்த சமயத்தில் நிர்வாக திட்டமிடலில் பிசியாக இருப்பதால், வேலைக்கு ஆள் எடுப்பதில் இந்த மாதங்களில் மந்தம் ஏற்பட்டு வருகிறது என்றார்.