தமிழக காங்கிரஸ் கட்சிக்கு மேலும் 3 அமைச்சர் பதவிகள்?

சென்னை: தமிழ காங்கிரஸ் கட்சியிலிருந்து மேலும் 3 பேருக்கு அமைச்சர் பதவி கிடைக்கும் எனத் தெரிகிறது.

தமிழக காங்கிரஸ் கட்சியிலிருந்து தற்போது ப.சிதம்பரம் மட்டுமே கேபினட் அமைச்சராகியுள்ளார். இவரைத் தவிர இன்னும் ஒருவருக்கு கேபினட் அமைச்சர் பதவி கிடைக்கலாம்.

இதுதவிர மேலும் 2 காங்கிரஸ் எம்.பிக்களுக்கு இணை அமைச்சர் பதவி கிடைக்கக் கூடும் எனத் தெரிகிறது. அந்தப் பதவியைப் பிடிக்க தற்போது தமிழக காங்கிரஸ் எம்.பிக்களிடையே கடும் போட்டி நிலவுகிறது.

ஜி.கே.வாசனுக்கு கேபினட் ...

கடந்த அமைச்சரவையில் தனிப் பொறுப்புடன் கூடிய இணை அமைச்சராக இருந்த ஜி.கே.வாசனுக்கு இம்முறை கேபினட் அமைச்சர் பதவி கிடைக்கக் கூடும் என பேச்சு அடிபடுகிறது.

இவர்கள் தவிர மற்ற இரு இடங்களுக்கு வாசன் கோஷ்டியைச் சேர்ந்த என்.எஸ்.வி. சித்தன், ஜே.எம். ஹாரூண், கே.எஸ்.அழகிரி ஆகியோரும், முன்னாள் காங்கிரஸ் தலைவர் கிருஷ்ணசாமி, காஞ்சிபுரம் விஸ்வநாதன், விருதுநகரில் வைகோவை வீழ்த்திய மாணிக்க தாகூர் ஆகியோரும் மோதிக் கொண்டிருக்கின்றனர்.

இவர்களில் மாணிக்க தாகூருக்கு அமைச்சர் பதவி கிடைக்கலாம் எனத் தெரிகிறது. வைகோவை வீழ்த்தியவர் என்ற பெயர் தவிர ராகுல் காந்தியின் நட்பையும் பெற்றவர் தாகூர் என்பதால் அவருக்கு வாய்ப்பு அதிகமாக உள்ளதாக கருதப்படுகிறது.

இவர்கள் தவிர ராஜ்யசபா உறுப்பினர்களான ஜெயந்தி நடராஜன், சுதர்சன நாச்சியப்பன் ஆகியோரும் அமைச்சர் பதவிக்கு முயற்சிப்பதாக தெரிகிறது.