தமிழக அரசு ஊழியர்களுக்கும் 6வது ஊதியக் கமிஷன் பரிந்துரைகள் அமல்

சென்னை: 6வது ஊதியக் கமிஷன் பரிந்துரைகளைப் பரிசீலித்த தமிழக உயர் மட்டக் குழு அளித்துள்ள பரிந்துரைகள் ஜூன் மாதம் முதல் அமலாக்கப்படும் என தமிழக அரசு அறிவித்துள்ளது.

மத்திய அரசு தனது ஊழியர்களுக்கு 6வது ஊதியக் கமிஷன் பரிந்துரைகளை அமல்படுத்தி விட்டது. இதையடுத்து தமிழக அரசு அந்தப் பரிந்துரைகள் குறித்து ஆராய குழு அமைத்தது. அந்தக் குழு ஆய்வு செய்து தனது அறிக்கையை முதல்வர் கருணாநிதியிடம் சமர்ப்பித்தது.

இதைப் பரிசீலனை செய்த அரசு தற்போது இந்தப் பரிந்துரைகள் உடனடியாக அமலுக்கு வருவதாக தெரிவித்துள்ளது.

இதுகுறித்து நிதித்துறை செயலாளர் வெளியிட்டுள்ள செய்திக்குறிப்பில், இந்த மாதம் முதலே பரி்ந்துரைகள் அமலுக்கு வருகின்றன. இதுதொடர்பான கோப்பில் முதல்வர் கையெழுத்திட்டுள்ளார்.

ஜூன் மாத சம்பளம் இந்த ஊதிய மாற்றத்தின் அடிப்படையில் வழங்கப்படும்.

2006ம் ஆண்டு ஜனவரி மாதம் முதல் கணக்கிட்டு இந்த ஊதிய உயர்வு அளிக்கப்படும் நிலுவைத் தொகை 3 கட்டமாக தரப்படும் என்று தெரிவித்துள்ளார்.