இந்தியாவை குறிவைக்கும் ஜெனரல் மோட்டார்ஸ்!

டெல்லி: ஜெனரல் மோட்டார்ஸ் எனப்படும் ஜிஎம் நிறுவனம் அமெரிக்காவில் திவாலாகிவிட்டதாக அறிவிக்கப்பட்டு, சட்டப்படி அமெரிக்க அரசின் கைகளுக்குப் போய்விட்டது.

ஆனால் அதற்காக அதன் இந்திய தொழிற்சாலைகளில் உற்பத்தி முடங்கிப் போகவில்லை. மாறாக இந்த ஆண்டு ரூ. 2 லட்சம் விலை கொண்ட சிறிய ரக கார்களை இந்தியாவில் விற்பனைக்கு விடப்போகிறது ஜிஎம்.

ஜிஎம் இந்தியா நிறுவனத்தின் துணைத் தலைவர் நிக் ரெய்லி இதுகுறித்து கூறுகையில், ஜிஎம்மின் இந்தியத் தொழிற்சாலைகளில் விரைவில் இந்த குறைந்த விலைக் கார்களை தயாரிக்கத் துவங்கவிருக்கிறோம். இந்தக் கார்கள் உலகம் முழுக்க விற்பனைக்கு விடப்படும். அதே நேரம் இந்தியாவில் அதை ரூ.2 லட்சத்துக்கு தரும் திட்டமுள்ளது.

எங்களது முந்தைய தயாரிப்பான ஸ்பார்க்கில் இருந்த வசதிகள் இந்த புதிய காரிலும் இருக்கும். இப்போதைக்கு ஜிஎம்மின் பெரிய நம்பிக்கைக்குரிய மார்கெட்டாக திகழ்வது இந்தியாதான். இங்குதான் குறைந்த செலவில் ஆராய்ச்சி மற்றும் வளர்ச்சிப் பணிகளை எங்களால் மேற்கொள்ள முடிகிறது.

இந்தியாவிலும் சீனாவிலும்தான் இப்போதைக்கு நாங்கள் முழு கவனம் செலுத்தப் போகிறோம். ஜிஎம் நிறுவன மீட்சிக்கு இந்த ஆசிய நாட்டு வாடிக்கையரின் தேவை அதிகரிப்புதான் கை கொடுக்கும்" என்றார்.