22,000 பணியாளர்களை நியமிக்கும் வால்மார்ட்!

நியூயார்க்: சில்லறை வர்த்தகத்தில் கொடிகட்டிப் பறக்கும் வால் மார்ட் நிறுவனம் 22000 புதிய பணியாளர்களை வாடகைக்கு பணியமர்த்துகிறது.

அமெரிக்காவில் தொடர்ந்து வேலை நீக்கம், ஆள்குறைப்பு போன்ற செய்திகளை மட்டுமே கேட்டு வந்த மக்களுக்கு வால் மார்ட்டின் இந்த அறிவிப்பு மிகப்பெரிய ஆறுதலைத் தந்துள்ளது.

ஸ்டோர் மேனேஜ்மெண்ட், பார்மஸிஸ்ட், மனிவள மேம்பாட்டுத் துறை, வாடிக்கையாளர் சேவைப் பிரிவு என தனது பல்வேறு பிரிவுகளுக்கு இந்தப் புதிய பணியாளர்களை நியமிக்கப் போகிறது வால்மார்ட்.

கடந்த மாதம்தான் 150க்கும் மேற்பட்ட புதிய சில்லறை விற்பனை மையங்களை அமெரிக்கா முழுவதும் திறந்தது வால்மார்ட்.

புதிய பணியாளர்களை நியமிக்கும் போக்கு மேலும் தொடரும் என்றும், இந்த ஆண்டு மேலும் சில ஆயிரம் பணியாளர்களை பணியமர்த்தப்போவதாக வால்மார்ட் துணைத் தலைவர் அறிவித்துள்ளார்.

இந்தியாவில் பார்தி நிறுவனத்துடன் இணைந்து தாங்கள் துவங்கவிருக்கும் சில்லறை விற்பனை நிலையங்களுக்கும் பல ஆயிரம் புதிய பணியாளர்களை எடுக்கப்போவதாக அந்நிறுவனம் அறிவித்துள்ளது.