புதுவை பேராசிரியர் அலிகார் சாலை விபத்தில் மரணம்

அலிகார்: புதுச்சேரி பல்கலைக்கழகத்தைச் சேர்ந்த பேராசிரியர் அமானுல்லா, அலிகார் அருகே நடந்த சாலை விபத்தில் உயிரிழந்தார்.

புதுச்சேரி பல்கலைக்கழகத்தின் காமர்ஸ் துறையைச் சேர்ந்தவர் அமானுல்லா (62). இவர் அலிகார் முஸ்லீம் பல்கலைக்கழகத்தில் நடந்த நிகழ்ச்சி ஒன்றில் பங்கேற்பதற்காக டெல்லி வந்து அங்கிருந்து கார் மூலம் அலிகார் போய்க் கொண்டிருந்தார்.

அப்போது, அலிகாருக்கு முன்புள்ள அர்னியா என்ற இடத்தில் கார் வந்தபோது எதிரே வந்த பஸ் கார் மீது பயங்கரமாக மோதியது. இதில் அமானுல்லா படுகாயமடைந்தார்.

உடனடியாக அருகில் உள்ள குர்ஜா என்ற நகரத்திற்கு அவரைக் கொண்டு சென்றனர். ஆனால் அங்கு மருத்துவ வசதிகள் இல்லை. இதையடுத்து மீண்டும் அவரை புலந்த்சாகர் அரசு மருத்துவமனைக்குக் கொண்டு சென்றனர். ஆனால் அதற்குள் அமானுல்லா உயிரிழந்து விட்டார்.

அமானுல்லாவின் உடலை புதுச்சேரிக்கு அனுப்புவதற்கான ஏற்பாடுகளை அலிகார் பல்கலைக்கழகம் மேற்கொண்டுள்ளது.