தமிழக நகரங்களில் பெட்ரோல்-டீசல் விலை பட்டியல்

சென்னை: பெட்ரோல் மற்றும் டீசல் விலை உயர்வைத் தொடர்ந்து தமிழகத்தின் முக்கிய நகரங்களில் பெட்ரோல், டீசல் விலை குறித்த பட்டியல்..

சென்னை -

பெட்ரோல் - ரூ. 48.58, டீசல் - ரூ. 34.98.

மதுரை -

பெட்ரோல் - ரூ. 48.52, டீசல் - ரூ. 35.40.

கோவை -

பெட்ரோல் - ரூ. 48.50, டீசல் ரூ. 35.25.

திருச்சி -

பெட்ரோல் - ரூ. 48.60, டீசல் - ரூ. 35.50.

நெல்லை -

பெட்ரோல் - ரூ. 48.70, டீசல் - ரூ. 35.59

சென்னை மாநகர கழகத்துக்கு நஷ்டம் ரூ. 4.5 லட்சம்:

சென்னை மாநகர போக்குவரத்து கழகத்தில் 3,000 பஸ்கள் இயக்கப்படுகின்றன. இந்த பஸ்களுக்கு தினமும் 20.2 லட்சம் லிட்டர் டீசல் செலவாகிறது. டீசல் விலை ரூ. 2 உயர்த்தப்பட்டதன் மூலம் மாநகர போக்குவரத்து கழகத்துக்கு நாள் ஒன்றுக்கு ரூ. 4.5 லட்சம் கூடுதல் செலவாகும் என்று அதன் நிர்வாக இயக்குனர் பால்ராஜ் தெரிவித்துள்ளார்.

காங்கிரஸ் அரசின் முதல் 'சாதனை'-பாஜக:

இதற்கிடையே பெட்ரோல் மற்றும் டீசல் விலையை கடுமையாக உயர்த்தியுள்ளது தான் ஐக்கிய முற்போக்குக் கூட்டணி அரசின் முதல் 100 நாள் சாதனை என்று பாஜக கூறியுள்ளது.

அக் கட்சியின் செய்தித் தொடர்பாளர் ராஜீவ் பிரதாப் ரூடி கூறுகையில், முதல் சாதனையைப் படைத்துவிடடார்கள் என்றார்.

அதே போல மார்க்சிஸ்ட் கம்யூனிஸ்ட் கட்சியும் பெட்ரோல் விலை உயர்வை கண்டித்துள்ளது. இது காங்கிரஸ் கூட்டணி அரசால் மக்களுக்கு அளிக்கப்பட்ட முதல் பரிசு என்று அக் கட்சி கூறியுள்ளது.

பட்ஜெட் கூட்டம் நடக்கும் நிலையில் பெட்ரோல் விலையை உயர்த்திய நடவடிக்கை நாடாளுமன்றத்தை அவமதிப்பதுபோல் ஆகும் என அக் கட்சி கூறியுள்ளது.

டீசல் மீது மத்திய அரசு வரிவிதிப்பை குறைக்க வேண்டும். தனியார் எண்ணெய் சுத்திகரிப்பு நிலையங்கள் மீது வரி விதிக்க வேண்டும். பெட்ரோல்-டீசல் விலையை உடனடியாக திரும்பப் பெற வேண்டும் என அக் கட்சி கோரியுள்ளது.

விஜய்காந்த் கண்டனம்:

அதே போல பெட்ரோல்-டீசல் விலைக்கு தேமுதிக தலைவர் விஜய்காந்த்தும் கடும் கண்டனம் தெரிவித்துள்ளதோடு அதை வாபஸ் பெற வேண்டும் என்றும் கோரியுள்ளார்.

இதனால் உணவுப் பொருட்களின் விலை உயரும் என்று அவர் கூறியுள்ளார்.