திமுக அரசு மீனவர்களுக்கு உதவி செய்கிறது - அதிமுக ஆட்சியோ பாழ்படுத்தியது: அமைச்சர் சாமி

சென்னை: கடந்த அதிமுக ஆட்சியில் மீனவர்களுக்கு மண்ணெண்ணையும், மீன் பிடிக்காத காலத்தில் உதவித் தொகையும் தராமல் அவர்கள் வாழ்க்கையைப் பாழ்படுத்தினர். ஆனால் முதல்வர் கருணாநிதியோ மீனவர்களுக்கு வாரி வழங்கி வருகிறார் என்று கூறினார் மீன்வளம் மற்றும் கால்நடை, பால்வளத் துறை அமைச்சர் கே.பி.பி.சாமி.

சட்டசபையில் இன்று மீன்வளம், பால்வளம், கால்நடை பராமரிப்பு துறை மானியக் கோரிக்கை மீதான விவாதம் நடந்தது.

கச்சத்தீவை மீட்க வேண்டும்...

அதில் கலந்து கொண்டு அதிமுகவைச் சேர்ந்த அனிதா ராதாகிருஷ்ணன் பேசுகையில், தமிழ்நாட்டு மீனவர்களை சிங்கள ராணுவத்தினர் அடிக்கடி பிடித்து சித்ரவதை செய்கிறார்கள். மீன்களை கொள்ளையடிக்கிறார்கள்.

கச்சத்தீவை திரும்ப பெற்றால்தான் நிம்மதியாக மீனவர்கள் மீன்பிடிக்க முடியும். எனவே கச்சத்தீவை மீட்க இந்த அரசு உரிய நடவடிக்கை எடுக்க வேண்டும்.

45 ஆயிரம் குடும்பங்கள் மண்ணெண்ணை உபயோகப்படுத்திதான் மீன்பிடி தொழிலில் ஈடுபடுகிறார்கள். ஆனால் அரசு மண்ணெண்ணை கொடுக்க மறுக்கிறது.

9 ஆயிரம் மீன்பிடி படகுகளுக்கு மண்ணெண்ணை தேவைப்படுகிறது. ஆனால் அரசு தருவதில்லை. தனியாரிடமும் வாங்க முடிவதில்லை. அதையும் மீறி வாங்கினால் போலீஸ் பிடிக்கிறது. எனவே அரசு இதில் நடவடிக்கை எடுக்க வேண்டும் என்றார்.

அதற்குப் பதிலளித்த அமைச்சர் கேபிபி சாமி கூறுகையில், மீனவர்கள் திருட்டுத்தனமாக மண்ணெண்ணை வாங்கும் சூழ்நிலை உள்ளதாக சொல்கிறார். நீங்கள் இதற்கு முன் அமைச்சராக இருந்திருக்கிறீர்கள். உங்கள் ஆட்சியில் என்ன முயற்சி எடுத்தீர்கள்.

கடைசி 3 மாதத்தில் மட்டும் மத்திய அரசிடம் இருந்து மண்ணெண்ணை பெற்று வழங்கினீர்கள். அதுவும் விலையை அதிகமாக்கி மீனவ மக்களை பாழ்படுத்தினீர்கள் என்றார்.

தொடர்ந்து அனிதா ராதாகிருஷ்ணன் பேசுகையில்,

மீன்பிடிக்க தடை செய்யப்படும் 45 நாட்களின்போது கொடுக்கப்படும் பணம் போதாது. அதை அதிகரித்து தர வேண்டும். 500 ரூபாய் தருவதை 5 ஆயிரம் ரூபாயாக உயர்த்த வேண்டும் என்றார்.

இதைக் கூட தரவில்லையே அதிமுக...

அதற்குப் பதிலளித்த சாமி, அ.தி.மு.க. ஆட்சியில் இந்த உதவி தொகை கூட வழங்கவில்லை. தி.மு.க. ஆட்சியில்தான் 45 நாட்களுக்கு தலா ரூ.500 வீதம் 2 லட்சம் மக்களுக்கு பணம் கொடுக்கிறோம். இதற்காக ரூ.10 கோடியை வாரி வழங்குபவர் முதல்- அமைச்சர் கருணாநிதி என்றார்.