தேமுதிக பொதுச் செயலாளர் ராமு வசந்தன் மரணம்

சென்னை: உடல் நலக்குறைவால் அவதிப்பட்டு வந்த தே.மு.தி.க. பொதுச்செயலாளர் ராமு வசந்தன் நேற்றிரவு மருத்துவமனையில் காலமானார். அவருக்கு வயது 54.

இவர் நடிகர் விஜய்காந்தின் தேசிய முற்போக்கு திராவிடர் கழகத்தின் பொதுச் செயலாளராக இருந்தார்.

சென்னை சாலி கிராமத்தில் குடும்பத்துடன் வசித்து வந்த ராமு வசந்தினுக்கு கடந்த இரு ஆண்டுகளாக சிறுநீரக கோளாறு இருந்துவந்தது. இதற்கென இவர் தனியார் மருத்துவமனையில் சிகிச்சை பெற்று வந்தார்.

இந்த நிலையில், சில நாட்களுக்கு ராமு வசந்தனின் உடல்நிலை மிகவும் பாதிக்கப்பட்டது. அதைத் தொடர்ந்து வடபழனியில் உள்ள தனியார் மருத்துவமனையில் சிகிச்சைக்காக அவர் அனுமதிக்கப்பட்டார். அங்கு அவருக்கு தீவிர சிகிச்சை அளிக்கப்பட்டது. ஆனால் நேற்றிரவு 10.45 மணியளவில் ராமு வசந்தன் மரணமடைந்தார்.

தகவல் அறிந்ததும், தே.மு.தி.க. இளைஞர் அணி செயலாளர் எல்.கே.சுதீஷ், தலைமை நிலைய செயலாளர் பார்த்தசாரதி ஆகியோர் மருத்துவமனைக்கு சென்றனர்.

கட்சித் தலைவர் விஜயகாந்துக்கும் தகவல் தெரிவிக்கப்பட்டது. மரணமடைந்த ராமு வசந்தனுக்கு மனைவியும், மகனும், மகளும் உள்ளனர்.

விஜய்காந்தின் ரசிகர் மன்ற நிர்வாகியாக நீண்டகாலம் பணியாற்றி, பின்னர் அவர் அரசியலுக்கு வந்ததும் அவருடன் இணைந்து செயல்பட்டவர் ராமுவசந்தன்.