தொண்டாமுத்தூர் திமுக தேர்தல் பணிக்குழுத் தலைவராக கண்ணப்பன் நியமனம்
சென்னை: தொண்டாமுத்தூர் தொகுதியில் போட்டியிய வாய்ப்பு கிடைக்காத முன்னாள் அமைச்சர் மு.கண்ணப்பன், தற்போது அத்தொகுதி திமுக தேர்தல் பணிக்குழுத் தலைவராக நியமிக்கப்பட்டுள்ளார்.
மதிமுகவிலிருந்து தாவி திமுகவுக்கு வந்தவர் கண்ணப்பன். தொண்டாமுத்தூர் தொகுதி எம்.எல்.ஏவாக இருந்தவர். இத்தொகுதியில் மீண்டும் இவரே நிறுத்தப்படுவார் என எதிர்பார்க்கப்பட்டது.
ஆனால் அந்தத் தொகுதியை கூட்டணிக் கட்சியான காங்கிரஸுக்கு திமுக ஒதுக்கியது.
இந்த நிலையில் தொண்டாமுத்தூர் தொகுதி திமுக தேர்தல் பணிக்குழுத் தலைவராக கண்ணப்பன் நியமிக்கப்பட்டுள்ளார். துணைத் தலைவராக பொங்கலூர் பழனிச்சாமி, செயலாளர்களாக சுப்புலட்சுமி ஜெகதீசன், பேரவை மு.சண்முகம், உறுப்பினர்களாக கோவை மு.ராமநாதன், எம்.வீரகோபால், பா.அருண்குமார், ரத்னா சாமிநாதன், நா.முருகவேல் ஆகியோர் நியமிக்கப்பட்டுள்ளனர்.
பர்கூருக்கு செல்வகணபதி
அதேபோல பர்கூர் தொகுதி திமுக தேர்தல் பணிக்குத் தலைவராக செல்வகணபதி நியமிக்கப்பட்டுள்ளார்.
செயலாளராக டி.செங்குட்டுவன், உறுப்பினர்களாக இ.ஜி.சுகவனம், எம்.வி.வெற்றிச்செல்வன், டாக்டர் காஞ்சனா கமலநாதன், எம்.யுவராஜ் ஆகியோர் நியமிக்கப்பட்டுள்ளனர்.
செல்வகணபதி அதிமுகவிலிருந்து திமுகவுக்கு வந்தவர் என்பது குறிப்பிடத்தக்கது.