இளையாங்குடியில் திமுக வெற்றி-தேமுதிகவுக்கு லாபம்
இளையாங்குடி: இளையாங்குடி தொகுதியில் திமுக வேட்பாளர் சுப.மதியரசன் 41,456 வாக்குகள் வித்தியாசத்தில் வெற்றி பெற்றார்.
இத்தொகுதியை திமுக தக்க வைத்துக் கொண்டுள்ளது.
இத்தொகுதியில் வேட்பாளர்கள் பெற்ற வாக்குகள்
சுப.மதியரசன் (திமுக) - 61,084
அழகு பாலகிருஷ்ணன் (தேமுதிக) - 19,628
ராஜேந்திரன் (பாஜக) - 1487
இங்கும் பாஜகவுக்கு டெபாசிட் காலியாகியுள்ளது.
இந்தத் தொகுதியிலும் தொண்டாமுத்தூரைப் போலவே திமுகவுக்கு பெரிய பலன் கிடைக்கவில்லை.
இந்தத் தொகுதியில் கடந்த முறையும் திமுகவே வென்றிருந்தது. ஆனால் திமுக சார்பில் கடந்த முறை போட்டியிட்ட ராஜ கண்ணப்பன் இப்போது அதிமுகவுக்கு வந்து விட்டதால், அவரே மீண்டும் இடைத் தேர்தலில் நிறுத்தப்படுவார் என்ற எதிர்பார்ப்பு நிலவியது.
ஆனால் தேர்தலையே புறக்கணித்து விட்டார் ஜெயலலிதா. இதனால் ராஜ கண்ணப்பன் தரப்பு ஏமாற்றத்தில் இருந்தது.
கடந்த தேர்தலில் ராஜ கண்ணப்பன் இங்கு 50,952 வாக்குகளைப் பெற்றார். அவருக்கு அடுத்த இடத்தைப் பிடித்த அதிமுக 38,246 வாக்குகளைப் பெற்றது. தேமுதிகவின் மணிமாறனுக்கு 2705 ஓட்டுக்கள் மட்டுமே கிடைத்தன.
ஆனால் இம்முறை, திமுவுக்கு 61,084 வாக்குகளே கிடைத்துள்ளன. கடந்த முறையை விட கிட்டத்தட்ட 12,000 ஓட்டுக்கள் கூடுதலாக கிடைத்துள்ளன.
அதேசமயம், தேமுதிகவுக்கு நல்ல பலன் கிடைத்துள்ளது. கடந்த முறை வெறும் 2,705 வாக்குகளை மட்டுமே பெற்ற தேமுதிக இந்தத் தேர்தலில் 19,628 வாக்குகளைப் பெற்றுள்ளது. இது 7 மடங்கு அதிக வாக்குகளாகும்.
இந்தத் தொகுதியில் அதிமுக சார்பில் ராஜ கண்ணப்பன் நிறுத்தப்பட்டிருந்தால் நிச்சயம் திமுகவுக்கு பெரும் சவாலாக அமைந்திருக்கும்.