குஜராத் இடைத் தேர்தல்-பாஜக அமோக வெற்றி

அகமதாபாத்: குஜராத்தில் நடந்த 7 சட்டசபை தொகுதிகளுக்கான இடைத் தேர்தலல் 5 இடங்களில் பாஜக அமோக வெற்றி பெற்றுள்ளது. காங்கிரஸ் இரு இடங்களில் மட்டுமே வென்றுள்ளது.

தண்டா, ஜஸ்தான், சமி, தெகாம், சோடிலா, தோராஜி, கோடினார் ஆகிய தொகுதிகளுக்கு கடந்த 10ம் தேதி இடைத் தேர்தல் நடந்தது.

இதில் கோடினார் பாஜக வசம் இருந்தது. மற்ற 6 தொகுதிகளிலும் கடந்த சட்டமன்றத் தேர்தலில் காங்கிரஸ் வென்றிருந்தது.

இந் நிலையில் இன்று நடந்த இடைத் தேர்தல் வாக்கு எண்ணிக்கையில் தண்டா, ஜஸ்தான், சமி, தெகாம், சோடிலா ஆகிய 5 இடங்களில் பாஜக பெரும் வாக்கு வித்தியாசத்தில் வென்றது.

தோராஜி, கோடினார் ஆகிய தொகுதிகளி்ல் காங்கிரஸ் அதிக வாக்கு வித்தியாசத்தில் வென்றது. இதன் மூலம் காங்கிரஸ் வசம் இருந்த 6 தொகுதிகளில் ஐந்தை பாஜக கைப்பற்றியுள்ளது.

பாஜக வசமிருந்த ஒரு தொகுதியை காங்கிரஸ் கைப்பற்றியுள்ளது.

இந்த இடைத் தேர்தல் பிரச்சாரத்தில் முதல்வர் நரேந்திர மோடி ஈடுபடவே இல்லை. இருப்பினும் பாஜக பெரும் வெற்றி பெற்றுள்ளது.

ஆந்திராவில் சிரஞ்சீவி கட்சிக்கு டெபாசிட் காலி:

இதற்கிடையே, ஆந்திர மாநிலம் தெக்காலி சட்டசபை இடைத் தேர்தலில் காங்கிரஸ் கட்சி மீண்டும் வெற்றி பெற்றது. சிரஞ்சீவி கட்சியின் வேட்பாளர் டெபாசிட் இழந்தார்.

7173 வாக்குகள் வித்தியாசத்தி்ல் தெலுங்கு தேசம் வேட்பாளரை, காங்கிரஸ் வீழ்த்தி தொகுதியைத் தக்க வைத்துக் கொண்டது.

கடந்த பொதுத் தேர்தலில் இத்தொகுதியில் சிரஞ்சீவியின் பிரஜா ராஜ்ஜியம் கட்சி 35,000 ஓட்டுக்களை அள்ளியிருந்தது. ஆனால் இந்த இடைத் தேர்தலில் அக்கட்சிக்கு வெறும் 15,000க்கும் சற்று அதிகமான வாக்குகளே கிடைத்தன. இதன் மூலம் அக்கட்சி டெபாசிட் தொகையை இழந்தது.