ராஜ்யசபா துணை சபாநாயகரின் அலுவலக கார் திருட்டு

டெல்லி: ராஜ்ய சபா துணைத் தலைவர் ரகுமான் கானின் அலுவலக கார் திருடு போயுள்ளது.

ரகுமான் கானி்ன் கார் அணிவகுப்பு வரிசையில் இடம் பெறும் சிவப்பு விளக்கு பொறுத்தப்பட்ட, விவிஐபி எலெக்ட்ரானிக் பாஸ்கள் ஒட்டப்பட்ட இந்தக் கார் நாடாளுமன்ற வளாகம் உள்பட டெல்லியின் முக்கிய அலுவலகங்களில் பாதுகாப்பு சோதனை இல்லாமல் நுழைய முடியும்.

மேலும் இதிலுள்ள வயர்லெஸ் மூலம் நாடாளுமன்ற பாதுகாப்பு அதிகாரிகள், டெல்லி போலீசாரி்ன் வயர்லெஸ் தகவல் பரிமாற்றத்தையும் கேட்க முடியும்.

இந்த காரை அதன் டிரைவர் நிரஞ்சன் மொஹந்தி, இந்திரா காந்தி விமான நிலையம் அருகே மகிபல்பூரில் உள்ள தனது வீட்டின் வெளியே நேற்றிரவு நிறுத்தியிருந்தார்.

இன்று காலை காரை காணவில்லை. இதுகுறித்து டெல்லி போலீசார் விசாரணை நடத்தி வருகின்றனர்.

விவிஐபி்க்களின் அலுவலக கார்களை டிரைவர்கள் வீட்டுக்குக் கொண்டு செல்வது வழக்கமாகவே இருந்து வரும் நிலையில் இந்த சம்பவம் நடந்துள்ளது.

பாதுகாப்பு காரணங்களை முன்னிட்டு திருடப்பட்ட காரின் விவிஐபி எலெக்ட்ரானிக் பாஸ்கள் செயலிழக்கச் செய்யப்பட்டுள்ளன. மேலும் அதில் உள்ள வயர்லெஸ் செட்டுக்கு தகவல் பரிமாற்றமும் நிறுத்தப்பட்டுள்ளது.

ராஜ்யசபாவின் தலைவராக இருப்பவர் துணை ஜனாதிபதி. அதன் துணைத் தலைவராக உள்ளவர் துணை சபாநாயகர் அந்தஸ்தில் உள்ள மிக உயர் பதவியில் இருப்பவர் ஆவார். அவருக்கு இசட் பிரிவு பாதுகாப்பு வழங்கப்படுவது வழக்கம்.