அநாதையாய் நின்ற துணை சபாநாயகரின் ஜீப்!

டெல்லி: டெல்லியில் திருடப்பட்ட ராஜ்யசபா துணை சபாநாயகர் ரகுமான் கானின் பாதுகாப்பு ஜீப் கண்டுபிடிக்கப்பட்டது. அதை ஓட்டுச் சென்ற நபர் அதை ரங்காபுரா பகுதியில் நிறுத்திவிட்டு தப்பிவிட்டான்.

ரகுமான் கானி்ன் பாதுகாப்பு அணிவகுப்பு வரிசையில் இடம் பெறும் சிவப்பு விளக்கு பொறுத்தப்பட்ட, விவிஐபி எலெக்ட்ரானிக் பாஸ்கள் ஒட்டப்பட்ட இந்த மகிந்திரா பொலேரா ஜீப் நாடாளுமன்ற வளாகம் உள்பட டெல்லியின் முக்கிய அலுவலகங்களில் பாதுகாப்பு சோதனை இல்லாமல் நுழைய முடியும்.

இந்த ஜீப்பை அதன் டிரைவர் நிரஞ்சன் மொஹந்தி, இந்திரா காந்தி விமான நிலையம் அருகே ஆர்.கே.புரம் செக்டார் 5 அருகே உள்ள மகிபல்பூரில் உள்ள தனது வீட்டின் வெளியே நேற்று முன் தினம் இரவு நிறுத்தியிருந்தார்.

நேற்று காலை ஜீப்பை காணவில்லை. இதை டெல்லி போலீசார் தேடி வந்தனர்.

இந் நிலையில் டெல்லியில் ரங்காபுரா பகுதியில் இந்த ஜீப் நிறுத்தப்பட்டிருந்தது கண்டுபிடிக்கப்பட்டது.