தேனி: பஸ் டிரைவர்கள் மொபைல் பேசத் தடை

தேனி: தேனியில் டிரைவர்கள் பேருந்து ஓட்டும் போது செல்போன் பேசுவதற்கு போக்குவரத்துப் போலீசார் தடை விதித்துள்ளனர்.

தேனி நகரில் அடிக்கடி ஏற்படும் போக்குவரத்து நெரிசலைக் கட்டுப்படுத்த போக்குவரத்து காவல்துறை சார்பில் தனியார் மற்றும் அரசு பேருந்து உரிமையாளர்கள் மற்றும் நிர்வாகிகள், மினி பஸ் உரிமையாளர்கள் மற்றும் ஓட்டுநர்கள் ஆலோசனைக் கூட்டம் நடைபெற்றது.

இந்தக் கூட்டத்தில், பஸ் மற்றும் கனரக வாகனங்களை இயக்கும் போது டிரைவர்கள் செல்போன் பேசக்கூடாது என ஒருமனதாக தீர்மானம் நிறைவேற்றப்பட்டது.

மேலும், நகர எல்லைக்குள் காற்று ஒலிப்பான்களை கண்டிப்பாக பயன்படுத்தக் கூடாது, நகருக்குள் 20 கி.மீ வேகத்துக்கு மேல் செல்லக் கூடாது என்பன உள்ளிட்ட தீர்மானங்களும் நிறைவேற்றப்பட்டன.