ஸ்டார் ஏவியேஷனை வாங்கும் ஜிஎம்ஆர் குழுமம்?

சென்னை: நாட்டின் முதல் பிராந்திய விமான சேவை நிறுவனமான ஸ்டார் ஏவியேஷன் ஹைதராபாத்தைச் சேர்ந்த ஜிஎம்ஆர் குழுமத்துடன் விற்பனை பேச்சுவார்த்தையில் ஈடுபட்டுள்ளது.

2007ம் ஆண்டே இந்த நிறுவனம் விமானங்களை இயக்க லைசென்ஸ் பெற்றுவிட்டது. ஆனால் சேவையை இன்னும் துவக்கவில்லை.

இதற்கிடையே சன் குழுமத்தின் கலாநிதி மாறனுடன் விற்பனை குறித்து பேச்சு நடத்தப்பட்டதாக செய்திகள் வெளியாகின. இதை ஸ்டார் குழுமம் மறுத்துவிட்டது. அந்நிறுவனத்தின் சிஇஓ டிவி துரைராஜ் கூறுகையில், 'ஸ்டார் ஏவியேஷன் மாறனுடன் எந்தப் பேச்சும் நடத்தவில்லை' என்றார்.

இதற்கிடையே ஸ்பைஸ் ஜெட் நிறுவனத்தின் 13 சதவீத பங்குகளை வாங்கும் முயற்சியில் கலாநிதி மாறன் தீவிரமாக உள்ளதாகக் கூறப்படுகிறது.

இந்நிலையில், இப்போது ஹைதராபாதைச் சேர்ந்த ஜிம்ஆர் குழுமத்துக்கு ஸ்டார் ஏவியேஷனை விற்க பேச்சு நடப்பதாகக் கூறப்படுகிறது.

டெல்லியில் உள்ள இந்திராகாந்தி சர்வதேச விமான நிலையம், ஹைதராபாத் ராஜீவ் காந்தி விமான நிலையம், துருக்கியின் இஸ்தான்புல் சபியா விமான நிலையம் போன்றவற்றின் பராமரிப்புப் பண்களை மேற்கொண்டுள்ளது ஜிஎம்ஆர் குழுமம். இவர்களுடன் இப்போது பேச்சுவார்த்தைகளில் இறங்கியிருப்பதாக துரைராஜ் தெரிவித்துள்ளார்.

"ஜிஎம்ஆர் குழுமத்துடனான பேச்சுக்களில் ஈடிஏ குழுமம் இறங்கும். இந்த ஆண்டு ஜூன் மாதம் எங்கள் நிறுவனத்தின் முதல் விமானம் பறக்கத் துவங்கும். அதற்கான அனுமதி பெற்றுள்ளோம். லைசென்ஸையும் புதுப்பித்துள்ளோம். உள்ளூர் வழித்தடங்களில் சிறப்பான சேவையை ஸ்டார் ஏவியேஷன் வழங்கும்" என்றார்.

இதுகுறித்து இப்போதைக்கு கருத்து எதுவும் தெரிவிப்பதற்கில்லை என்று ஜிஎம்ஆர் குழுமம் கூறியுள்ளது.