மதுரை மாநகராட்சி பட்ஜெட் தாக்கல் - ஆம்னி பஸ்களுக்கு தனி பஸ் ஸ்டாண்ட்

மதுரை: மதுரை மாநகராட்சியில் இன்று பட்ஜெட்டை மேயர் தேன்மொழி தாக்கல் செய்தார். அதில் புதிய வரிகள் ஏதும் விதிக்கப்படவில்லை. ரூ. 6 கோடி பற்றாக்குறையுடன் கூடியதாக பட்ஜெட் அமைந்துள்ளது.

மதுரை மாநகராட்சியில் இன்று 2010-11ம் ஆண்டுக்கான பட்ஜெட் தாக்கல் செய்யப்பட்டது. இதில் ரூ. 6 கோடி பற்றாக்குறை இருப்பதாக தெரிவிக்கப்பட்டுள்ளது.

ஆம்னி பஸ்களை நிறுத்த மாட்டுத்தாவணி பஸ் நிலையம் அருகே தனி பேருந்து நிலையம் அமைக்கப்படும் என பட்ஜெட்டில் அறிவிக்கப்பட்டுள்ளது.

இதேபோல ரூ. 9 கோடி மதிப்பில் அடுக்குமாடி வணிக வளாகம் அமைக்கப்படும். மீனாட்சி அம்மன் கோவிலைச் சுற்றிலும் ரூ. 51 லட்சத்தில் புதிய விளக்குகள் பொருத்தப்படும் என்ற அறிவிப்புகளும் அதில் இடம் பெற்றுள்ளன.

மதுரை மாநகராட்சியின் வருவாய் ரூ. 938 கோடி என்றும் பட்ஜெட்டில் தெரிவிக்கப்பட்டுள்ளது.

முன்னதாக பட்ஜெட்டுக்கு எதிர்ப்பு தெரிவித்து அதிமுக, சிபிஎம் கவுன்சிலர்கள் வெளிநடப்பு செய்தனர்.