பிரிட்டனின் நம்பர் ஒன் பணக்கார ஆசியர் லட்சுமி மிட்டல்

லண்டன்: பிரிட்டனில் வசிக்கும் ஆசியர்களில் 2010-ம் ஆண்டின் நம்பர் ஒன் பணக்காரராக இந்தியாவின் லட்சுமி மிட்டல் அறிவிக்கப்பட்டுள்ளார்.

1 லட்சத்து 19 ஆயிரம் கோடி சொத்துக்கள் மதிப்புடன் அவர் முதலிடத்தைப் பிடித்துள்ளதாக 'ஏசியன் மீடியா மற்றும் மார்க்கெட்டிங் குரூப்' என்ற நிறுவனத்தின் ஈஸ்டர்ன் ஐ பத்திரிகை நடத்திய 2010-ம் ஆண்டுக்கான கருத்துக்கணிப்பில் தெரிவித்துள்ளது. லட்சுமி மிட்டல், உலகின் மிகப்பெரிய இரும்பு எஃகு நிறுவனமான ஆர்செலார் மிட்டலின் தலைவர் மற்றும் தலைமைச் செயல் அலுவலராக உள்ளார்.

அவருக்கு அடுத்தபடியாக இந்துஜா சகோதரர்களான ஸ்ரீசந்த் மற்றும் கோபிசந்த் ஆகியோர் 2-வது இடத்தில் உள்ளனர். அவர்களின் சொத்து மதிப்பு 56 ஆயிரம் கோடி ஆகும்.

சுமார் 28 ஆயிரம் கோடி சொத்து மதிப்புடன் வேதாந்தா ரிஸோர்ஸஸ் நிறுவனத்தின் அனில் அகர்வால் 3-வது இடம் பிடித்து உள்ளார்.

லண்டனின் ஸோபிடெல் ஹோட்டலில் இந்த பணக்காரர்கள் பட்டியல் வெளியிடப்பட்டது. அப்போது இந்துஜா சகோதரர்களுக்கு பல்வேறு துறைகளில் சாதனை படைத்ததற்காக வாழ்நாள் சாதனையாளர் விருதும் வழங்கப்படுவதாக அறிவிக்கப்பட்டது.