அண்ணா சமாதிக்கு திடீரென சென்ற முதல்வர்-நீண்ட நேரம் சுற்றிப் பார்த்தார்

சென்னை: முதல்வர் கருணாநிதி நேற்று இரவு திடீரென அண்ணா சமாதிக்குச் சென்று அங்கு நீண்ட நேரம் இருந்தார்.

தினசரி காலை அல்லது மாலையில் முதல்வர் கருணாநிதி புதிய சட்டமன்ற வளாகத்திற்குச் செல்வது வழக்கம். அங்கு அதிகாரிகளுடன் அவர் ஆலோசனை நடத்துவார். இந்த நிலையில் நேற்று மாலை வழக்கம் போல சட்டமன்ற வளாகத்திற்குச் சென்ற முதல்வர் திரும்பும்போது அண்ணா சமாதிக்குச் செல்லுமாறு டிரைவரிடம் கூறினார். இதையடுத்து முதல்வரின் கார் அண்ணா சமாதிக்குச் சென்றது.

அங்கு நீண்ட நேரம் சமாதியை முதல்வர் சுற்றிப் பார்த்தார். 8 மணி முதல் 9 மணி வரை அங்கேயே அமர்ந்திருந்தார். பழைய நினைவுகளில் முதல்வர் மூழ்கினார். தன்னுடன் இருந்தவர்களிடம் அண்ணா குறித்த நினைவுகளையும் அவர் பகிர்ந்து கொண்டார். பின்னர் கனத்த இதயத்துடன் அங்கிருந்து அவர் புறப்பட்டுச் சென்றார்.