காஷ்மீர் இளைஞர்களுக்கு 5 லட்சம் வேலை தேவை-காங்கிரஸ்

ஸ்ரீநகர்: காஷ்மீர் இளைஞர்களை முற்றிலும் வளர்ச்சிப் பாதைக்கும், ஆக்கப்பூர்வமான வழிக்கும் திருப்புவதற்கு 5 லட்சம் வேலைகள் தேவை என்று கூறியுள்ளது ஜம்மு காஷ்மீர் மாநில இளைஞர் காங்கிரஸ்.

இதுகுறித்து இளைஞர் காங்கிரஸ் பொதுச் செயலாளர் விகார் ரசூல் கூறுகையில், காஷ்மீரில் தனியார் துறையினரே இல்லை. இதனால் பெருமளவில் வேலைவாய்ப்பு திண்டாட்டம் உள்ளது. இதுதான் பல பிரச்சினைகளுக்குக் காரணம்.

எனவே மத்திய அரசும், மாநில அரசும் மிகப் பெரிய அளவில் வேலைவாய்ப்புத் திட்டத்தை அறிவிக்க வேண்டும். இதன் மூலம் காஷ்மீர் இளைஞர்களை வன்முறைப் பாதையிலிருந்து திருப்ப முடியும்.

காஷ்மீர் இளைஞர்கள் மத்திய அரசின் எட்டு அம்சத் திட்டத்தை ஏற்றுக் கொண்டு வன்முறையைக் கைவிட்டுவிட்டு மாநிலத்தின் வளர்ச்சிக்காக பாடுபட முன்வர வேண்டும் என்றார் ரசூல்.