நிலத் தகராறு: உடன்குடி அருகே அதிமுக கிளை செயலாளருக்கு வெட்டு

உடன்குடி: உடன்குடி அருகே அதிமுக கிளை செயலாளர் சரமாரியாக வெட்டி சாய்க்கப்பட்டார். இதனால் அங்கு பரபரப்பு ஏற்பட்டது.

உடன்குடி அருகேயுள்ள வேதகோட்டைவிளையைச் சேர்ந்தவர் செல்வராஜ். தனியார் எண்ணெய் ஆலையில் வேலை பார்த்து வரும் இவர் அதிமுக கிளை செயலாளராக உள்ளார்.

அதிமுகவுக்கு சொந்தமான இடம் வேதகோட்டைவிளை கிராமத்தில் உள்ளது. அதில் பாதி கட்டிய நிலையி்ல் கட்சி கட்டிடம் உள்ளது. அதன் அருகே அதே ஊரைச் சேர்ந்த கிங்ஸ்லின் மற்றும் அவரது சகோதரர்களுக்கு சொந்தமான இடம் உள்ளது. அங்கு நேற்று முன்தினம் காலை கிங்ஸ்லின் மற்றும் அவரது சகோதரர்கள் தட்டி உள்ளிட்ட பொருட்களால் மறைப்பு ஏற்படுத்தி வீடு கட்டும் பணிகளைத் துவங்கினர்.

இதையறிந்த அப்பகுதி மக்கள் திரண்டு வந்து அதி்முக இடத்தை ஆக்கிரமிப்பதாக கூறித் தடுத்தனர். மேலும் மறைப்புகளை அப்புறப்படுத்துமாறும் கூறினர். நேற்று மாலைக்குள் அப்புறப்படுத்துவதாக கிங்ஸ்லின் கூறியதையடுத்து அவர்கள் கலைந்து சென்றனர்.

இந்நிலையில் வேலைக்கு சென்று விட்டு இரவு வீட்டுக்கு வந்த செல்வராஜிடம் இந்த சம்பவம் குறித்து தெரிவிக்கப்பட்டது. உடனே அவர் கிங்ஸ்லின் வீட்டுக்குச் சென்று இது பற்றி கேட்டார். அப்போது ஏற்பட்ட தகராறில் கிங்ஸ்லின் மற்றும் அவரது உறவினர்கள் செல்வராஜை சரமாரியாக வெட்டிவிட்டு தப்பி ஓடிவிட்டனர்.

படுகாயம் அடைந்த செல்வராஜை அப்பகுதி மக்கள் 108 ஆம்புலன்ஸ் மூலம் இரவு 10.30 மணி அளவில் உடன்குடி அரசு மருத்துவமனைக்கு கொண்டு சென்றனர். அப்போது அங்கு டாக்டர் இல்லாததால் சிகிச்சை அளிப்பதில் தாமதம் ஏற்பட்டது.

இதையறிந்த உடன்குடி பேரூராட்சி தலைவர் சாகுல் ஹமீது, கவுன்சிலர் முகைதீன், சமூக சேவகர் கலீல் ரகுமான் மற்றும் அப்பகுதி மக்கள் மருத்துவமனைக்கு திரண்டு வந்தனர். இதனால் அங்கு பரபரப்பு ஏற்பட்டது.

அதன்பிறகு அங்கிருந்த நர்சுகள் செல்வராஜுக்கு முதல் உதவி அளித்தனர். பின்னர் அவரை மேல்சிகிச்சைக்காக 108 மூலம் திருச்செந்தூர் அரசு மருத்துவமனைக்கு அனுப்பி வைத்தனர். இது தொடர்பாக குலசேகரப்பட்டினம் போலீசார் விசாரணை நடத்தி வருகின்றனர்.