டெல்லி, வட மாநிலங்களில் கடும் குளிர்-மக்கள் அவதி

டெல்லி: டெல்லி மற்றும் வட மாநிலங்களில் நடுங்க வைக்கும் குளிர் நிலவுகிறது. இதனால் மக்கள் வெதுவெதுப்பைத் தேடி ஓடிக் கொண்டிருக்கின்றனர்.

இன்று காலை டெல்லியில் வெப்ப நிலை 3.7 டிகிரியாக இருந்தது. இதனால் மக்கள் கடும் குளிரில் நடுங்கினர். இந்த சீசனிலேயே இதுதான் குறைந்தபட்ச வெப்பநிலையாகும். அதிகபட்ச வெப்ப நிலையாக 14.7 டிகிரி செல்சியஸ் பதிவாகியுள்ளது. நகர் முழுவதும் கடும் குளிர் காற்று வீசி வருகிறது. நேற்று டெல்லியில் குறைந்தபட்ச வெப்ப நிலை 4 டிகிரியாக இருந்தது.

டெல்லி தவிர வட மாநிலங்கள் முழுவதும் கடும் குளிர் நிலவி வருகிறது. டிசம்பர் 26ம் தேதி முதல் நிலவி வரும் கடும் குளிருக்கு பலர் பலியாகியுள்ளனர்.

கடும் குளிரும், குளிர் காற்றுமாக இருப்பதால் மக்கள் ஆங்காங்கே அனல் மூட்டி குளிர் காய்வதைக் காண முடிகிறது. சாலையோரங்களில் தங்கியிருப்போர் நிலைமைதான் மிகவும் அவலமாக உள்ளது. இருக்கிற கம்பளிகளுக்குள் ஒட்டுமொத்த குடும்பமும் தஞ்சம் புக வேண்டிய பரிதாபமான நிலையில் அவர்கள் உள்ளனர்.