கே.பராசரன், ஆசிம் பிரேம்ஜிக்கு பத்ம விபூஷன் விருது-தமிழகத்திலிருந்து 12 பேருக்கு விருது

Published: Wednesday, January 26, 2011, 10:35 [IST]

Subscribe to Oneindia Tamil

டெல்லி: முன்னாள் அட்டர்னி ஜெனரல் கே.பராசரன், விப்ரோ தலைவர் ஆசிம் பிரேம்ஜி உள்ளிட்ட 13 பேருக்கு பத்ம விபூஷன் விருதும், பிரபல பின்னணிப் பாடகர் எஸ்.பி.பாலசுப்ரமணியம் உள்ளளிட்ட 31 பேருக்கு பத்ம பூஷன் விருதும், அவ்வை நடராஜன், நடிகர் ஜெயராம் உள்ளிட்ட 84 பேருக்கு பத்ம ஸ்ரீ விருதுகளும் அறிவிக்கப்பட்டுள்ளன.

தமிழகத்தைச் சேர்ந்த 12 பேருக்கு பத்ம விருதுகள் கிடைத்துள்ளன. இதில் 3 பேருக்கு பத்ம பூஷனும், 9 பேருக்கு பத்மஸ்ரீ விருதும் கிடைத்துள்ளன. யாருக்கும் பதம விபூஷன் விருது கிடைக்கவில்லை. பராசரன் சென்னையைச் சேர்ந்தவராக இருந்தாலும் அவர் டெல்லியைச் சேர்ந்தவராக அறிவிக்கப்பட்டு விருது கொடுக்கப்பட்டுள்ளது.

அதேபோல நடிகர் ஜெயராம் கேரளாவைச் சேர்ந்தவராக இருந்தாலும் தமிழ்நாட்டிலிருந்து விருது தருவதாக அறிவிக்கப்பட்டுள்ளது.

தமிழகத்திலிருந்து விருது பெற்றவர்கள்

பத்ம பூஷன் - எஸ்.பி.பாலசுப்ரமணியம், சி.வி. சந்திரசேகர், டாக்டர் சூரியநாராயணன் ராமச்சந்திரன்.

பத்மஸ்ரீ - அவ்வை நடராஜன், ஜெயராம், எம்.கே.சரோஜா, எஸ்.ஆர்.ஜானகி ராமன், கோவை நாராயண ராவ் ராகவேந்திரன், ரபீக் அகமது மெக்கா, கைலாசம் ராகவேந்திர ராவ், மாதனூர் அகமது அலி, டாக்டர் சிவபாதம் விட்டல்.

மற்ற பிரபலங்கள்

விப்ரோ தலைவர் ஆசிம் பிரேம்ஜிக்கு பத்ம விபூஷன் விருது கிடைத்துள்ளது. அதேபோல பிரபல தெலுங்கு நடிகர் நாகேஸ்வர ராவ், விஜய் கெல்கர், எம்.எஸ்.அலுவாலியா, பிரஜேஷ் மிஸ்ரா ஆகியோருக்கும் பத்ம விபூஷன் விருது கிடைத்துள்ளது.

நடிகர் சசிகபூர், நடிகை வஹீதா ரஹ்மான், ஐசிஐசிஐ வங்கித் தலைவர் சந்தா கோச்சார் ஆகியோருக்கு பத்ம பூஷன் விருது கிடைத்துள்ளது.

நடிகைகள் தபு, கஜோல், பாடகி உஷா உதுப் உள்ளிட்ட 84 பேருக்கு பத்மஸ்ரீ விருது கிடைத்துள்ளது.

Published On January 26, 2011