ரயில்வே பட்ஜெட்-தமிழகத்திற்கு 2 துரந்தோ ரயில்கள் அறிமுகம்-திட்டங்களுக்கு நிதி ஒதுக்கீடு பூஜ்யம்

Published: Friday, February 25, 2011, 14:54 [IST]

Subscribe to Oneindia Tamil

டெல்லி: மத்திய ரயில்வே அமைச்சர் மமதா பானர்ஜி இன்று தாக்கல் செய்த ரயில்வே பட்ஜெட்டில் தமிழகத்திற்கு 2 துரந்தோ எக்ஸ்பிரஸ் ரயில்கள் மற்றும் சில புதிய ரயில்கள் அறிவிக்கப்பட்டுள்ளன. இருப்பினும் அமல்படுத்தப்பட்டு வரும் பல திட்டங்களுக்கு நிதி ஒதுக்கீடு அறிவிக்கப்படவில்லை. பெரிதும் எதிர்பார்க்கப்பட்ட பல்வேறு திட்டங்கள் குறித்த அறிவிப்பும் இடம் பெறவில்லை.

மதுரைக்கு 2 துரந்தோ ரயில்கள்:

- சென்னை-மதுரைக்கு புதிய துரந்தோ எக்ஸ்பிரஸ் அறிமுகம்
- சென்னை-மதுரை-திருவனந்தபுரம் இடையே புதிய துரந்தோ எக்ஸ்பிரஸ்

இதன் மூலம் சென்னையிலிருந்து மதுரைக்கும், மதுரை வழியாக சென்னைக்கும் என மதுரைக்கு 2 துரந்தோ ரயில்கள் கிடைத்துள்ளன. தற்போது ஏற்கனவே சென்னை கோவை இடையே ஒரு துரந்தோ ரயில் உள்ளது. அதேபோல பெங்களூருக்கும் ஒரு ரயில் உள்ளது என்பது குறிப்பிடத்தக்கது.

மிகக் குறைந்த புறநகர் ரயில்கள்:

கொல்கத்தாவுக்கு 50 புறநகர் ரயில்களை அறிவித்துள்ள மமதா பானர்ஜி, சென்னைக்கு மட்டும் வெறும் 9 புதிய புறநகர் ரயில்களை அறிவித்துள்ளார். ஏற்கனவே கூட்டம் நிரம்பி வழிந்து வருவதால் புறநகர் ரயில் சேவையை அதிகரிக்க வேண்டும் என்ற கோரிக்கை நிலவி வரும் நிலையில் வெறும் 9 ரயில்களை மட்டும் அவர் அறிவித்துள்ளது சென்னை மக்களை பெரும் ஏமாற்றத்தில் ஆழ்த்தியுள்ளது. இந்த புதிய சேவைகள், சென்னை கடற்கரையிலிருந்து ஆவடி, கும்மிடிப்பூண்டி, திருவள்ளூர், செங்கல்பட்டுக்கு இயக்கப்படும்.

புதிய ரயில்கள்:

- கன்னியாகுமரி-திருவனந்தபுரம்-திப்ரூகர் எக்ஸ்பிரஸ்

- சென்னை-புதுச்சேரி-மதுரை-எர்ணாகுளம் புதிய ரயில்
- காரக்பூர்-வேலூர்-விழுப்புரம் ரயில்
- சென்னை-மைசூர் எக்ஸ்பிரஸ்
- தூத்துக்குடி-கோவை இணைப்பு ரயில்
- நர்சபூர்-நாகர்கோவில் ரயில்
- நாகர்கோவில்-கொல்லம் ரயில்
- தர்மபுரி-பங்காருப்பேட்டை-பெங்களூர் ரயில்

புதிய ரயில் பாதைகள்:

தமிழகத்தில் புதிய ரயில் பாதை அமைப்பு தொடர்பான அறிவிப்புகளையும் மமதா வெளியிட்டார். அவை

- திருப்பதி -காஞ்சிபுரம் புதிய ரயில் பாதை
- மன்னார்குடி-புதுக்கோட்டைக்குப் புதிய ரயில் பாதை
- கூடுவாஞ்சேரி-ஸ்ரீபெரும்புதூருக்கு புதிய ரயில் பாதை

நாகர்கோவில்-திருவனந்தபுரம் பாசஞ்சர் ரயில் கொச்சுவேலி வரை நீட்டிக்கப்பட்டுள்ளது.

இதேபோல, பெரம்பூர் ஐசிஎப் ஆலையில் 2 உற்பத்திப் பிரிவு விரைவில் தனது உற்பத்தியைத் தொடங்கும் என்றும் அறிவிக்கப்பட்டுள்ளது.

Published On February 25, 2011