திமுகவின் அதிரடி முடிவால் சரிந்த பங்குச் சந்தை... 331 புள்ளிகள் வீழ்ச்சி!!

மும்பை: காங்கிரஸ் கூட்டணியிலிருந்து விலகுவதாக திமுக வீசிய அஸ்திரத்தின் பாதிப்பு இன்று பங்குச் சந்தையில் பலமாக எதிரொலித்தது.

காலையில் வர்த்தகம் துவங்கியதுமே புள்ளிகள் மளமளவென சரிந்தது. 331 புள்ளிகளை இழந்துள்ளது மும்பை பங்குச் சந்தை குறியீடான சென்செக்ஸ்.

திமுக - காங்கிரஸ் பிளவு நிரந்தரம் என்பது உறுதியானால் இன்னும் சில நூறு புள்ளிகள் சரியும் என்கிறார்கள் நிபுணர்கள். திமுகவின் இந்த முடிவு, அரசியல் ஸ்திரமின்மைக்கு அடிகோலியுள்ளதால், முதலீட்டாளர்கள் மளமளவென்று தங்களிடம் உள்ள பங்குகளை தள்ளிவிட முயன்றதுதான் இந்த சரிவுக்குக் காரணம் என்கிறார்கள்.

இப்போதைய நிலவரப்படி 331 புள்ளிகளை இழந்து 18,155.39 ஆக உள்ளது சென்செக்ஸ். தேசிய பங்குச் சந்தை நிப்டி 100 புள்ளிகளை இழந்து 5,438.45-ல் ஊசலாடிக் கொண்டுள்ளது.

மாலைக்குள் ஏற்படும் அரசியல் மாறுதல்களைப் பொறுத்த இந்த சரிவு மீட்சி பெறும் அல்லது அதிகரிக்கும் சூழல் உள்ளது.

English summary

The Bombay Stock Exchange benchmark Sensex fell by over 331 points in the early trade on Monday on fresh spell of sell-off by funds, triggered by political worries. The trading sentiments turned weak due to political worries after a key ally, DMK, decided to pull out of the Congress-led government at the Centre, said traders.