கொலை நகரமாகும் மதுரை: மக்கள் பீதி

மதுரை: மதுரையில் அடுத்தடுத்து கொலைகள் நடப்பதால் அங்குள்ள பொது மக்கள் பீதி அடைந்துள்ளனர்.

மதுரை ஊமச்சிகுளம் அருகே உள்ள உச்சபரம்பு என்னும் இடத்தில் டீக்கடை வைத்திருந்தவர் மணிகண்டவேலன் (17). நேற்று கள்ளழகர் திருவிழா நடந்ததால் அவர் கடையை திறக்கவில்லை.

அப்போது அந்த பகுதியைச் சேர்ந்த சிலர் மணிகண்டவேலனின் டீக்கடைக்குள் மது அருந்திவிட்டு ரகளையில் ஈடுபட்டுள்ளனர். இது பற்றி தகவல் அறிந்த அவர் கடைக்குச் சென்று அங்கு குடிபோதையில் இருந்தவர்களை கண்டித்துள்ளார். இதனால் ஆத்திரம் அடைந்த அந்த கும்பல் மணிகண்டவேலனை சரமாரியாக வெட்டியது. இதைப் பார்த்து தடுக்க வந்த துணி தேய்க்கும் தொழிலாளி விஸ்வநாதனுக்கும் அரிவாள் வெட்டு விழுந்தது. படுகாயம் அடைந்த இருவரையும் அரசு மருத்துவமனைக்கு கொண்டு சென்றனர். ஆனால் அவர்கள் வழியிலேயே இறந்தனர்.

இது குறித்து ஊமச்சிகுளம் போலீசார் வழக்குப் பதிவு செய்து உச்சிபரம்பைச் சேர்ந்த மணிகண்டன் (18), ராமு (27), மணி (23), வீரமணி (20), ரமேஷ் (28), சவுந்தர் (24) ஆகிய 6 பேரை கைது செய்தனர்.

இதில் மணியும், வீரமணியும் சகோதரர்கள். கைதான 6 பேரிடமும் போலீசார் தொடர்ந்து விசாரணை நடத்தப்படுகிறது.

மேலும் ஒரு கொலை:

மதுரை துவரிமான் களத்துமேட்டு பகுதியைச் சேர்ந்தவர் சுந்தர் (37). டிரைவர். அவர் கடந்த ஞாயிற்றுக்கிழமை இரவு குடித்துவிட்ட தனது நண்பர்களுடன் தகராறு செய்துள்ளார். இதில் சுந்தர் அரிவாளால் தாக்கப்பட்டார். படுகாயம் அடைந்த அவரை மதுரை அரசு மருத்துவமனையில் சிகிச்சைக்காக சேர்த்தனர். ஆனால் அவர் சிகிச்சை பலனின்றி இறந்தார்.

இது குறித்து நாகமலை புதுக்கோட்டை போலீசார் வழக்குப்பதிவு செய்து கருணாகரன் (19) என்பவரை கைது செய்தனர்.
மேலும் ராமு உள்பட 4 பேரை தேடி வருகிறார்கள். மதுரையில் அடிக்கடி கொலைச் சம்பவம் நடப்பதால் மக்கள் பீதியடைந்துள்ளனர்.

English summary

Temple city Madurai is seeing lot of murders recently. This makes the people scared. Two men have been killed on april 17 and 18. Police have arrested 7 people so far and are in search of others.