விளம்பரப் பட வருவாய்: சச்சினுக்கு வருமான வரி விலக்கு!

மும்பை: சச்சின் டெண்டுல்கர் விளம்பரங்களில் நடித்து சம்பாதித்த பணத்துக்கு வரிச் சலுகை அளிக்க வருமான வரித்துறை அனுமதி வழங்கியுள்ளது.

விளம்பரங்களில் நடிப்பதன் மூலம் தான் சம்பாதித்த பணத்துக்கு வருமான வரியில் சலுகை வழங்க வேண்டுமென்றும், தன்னை நடிகராகவும் கருத வேண்டுமென்றும் வருமான வரித்துறையிடம் ஏற்கெனவே சச்சின் கேட்டுக் கொண்டிருந்தார்.

2001 -02 முதல் 2004-05 வரை விளம்பரத்தில் நடித்து பெற்ற பணத்துக்காக சச்சின் வருமான வரிச்சட்டம் பிரிவு 80 ஆர்ஆரின் கீழ் வரிவிலக்கு கோரியிருந்தார்.

அதில் "நான் தொழில்முறையில் கிரிக்கெட் விளையாடி வருகிறேன் என்றாலும், விளம்பரத்தில் நடித்து சம்பாதித்த பணத்துக்கு மட்டும்தான் வரிச் சலுகை கோருகிறேன். இதற்கு முன்பு இதேபோன்ற சலுகைகள் வழங்கப்பட்டுள்ளது," என்று சச்சின் தரப்பில் கூறப்பட்டிருந்தது. தான் நடித்த விளம்பரங்களையும் அவர் சமர்ப்பித்திருந்தார்.

இதனை வருமான வரித்துறையின் இரு நபர் தீர்ப்பாயம் விசாரித்தது. சச்சின் தரப்பு வாதத்தை ஏற்றுக் கொண்ட தீர்ப்பாயம் அவர் வருமான வரியில் சலுகை பெற அனுமதி அளித்தது.

சச்சின் வரிச் சலுகை கோரும் காலகட்டத்தில் அவர் மொத்தம் 20 கோடி ரூபாய் சம்பாதித்துள்ளார். இதில் அன்னியச் செலாவணி மூலம் கிடைத்தது சுமார் 6 கோடி என்று தீர்ப்பாயம் கூறியுள்ளது.

இதற்காக அவருக்கு சுமார் ரூ.6 கோடி வருமான வரி பிடிக்கப்பட வேண்டும். ஆனால் சச்சின் பெற்ற சலுகையால் சுமார் ரூ.2 கோடி மட்டுமே வரிப்பிடித்தம் செய்யப்படும். இதன் மூலம் ரூ 4 கோடி அவருக்கு மிச்சமாகியுள்ளது.

English summary

An Income Tax tribunal has allowed ace cricketer Sachin Tendulkar to claim deductions from his taxable income pertaining to earnings from modelling in advertisements.