ஊழலுக்கு எதிராக போராடும் அன்னா, ராம்தேவுக்கு எதிராக காங். பிரசார போராட்டம்

கொல்கத்தா: ஊழலுக்கு எதிராக போராடி வரும் அன்னா ஹஸாரே மற்றும் ராம்தேவ் ஆகியோருக்கு எதிராக புதிய பிரசாரப் போராட்டத்தை காங்கிரஸ் கட்சி அறிவித்துள்ளது. இவர்கள் இருவரையும் எதிர்த்து இந்தப் போராட்டம் அமையும் என காங்கிரஸ் தெரிவித்துள்ளது.

உலக மகா ஊழல்களுக்குச் சொந்தக்காரர்களாக இருக்கும் காங்கிரஸ் தலைமையிலான ஐக்கிய முற்போக்குக் கூட்டணி அரசு தற்போது ஊழலுக்கு எதிரான போராட்டத்தை நசுக்கவும், ஒன்றுமில்லாமல் போகச் செய்யவும், அதில் ஈடுபட்டிருப்போர் மீது அவதூறை சுமத்தவும் தீவிரமாக களம் இறங்கியுள்ளது.

ராம்தேவை விமான நிலையம் வரை போய் வரவேற்று கூட்டி வந்து பேச்சு நடத்திய நிதியமைச்சர் பிரணாப் முகர்ஜி இந்தப் புதிய போராட்டம் குறித்து நேற்று கொல்கத்தாவில் செய்தியாளர்களிடம் விவரித்தார்.

அப்போது ராம்தேவை மட்டுமல்லாமல் காந்தியவாதி அன்னாவையும் கடுமையாக விமர்சித்தார் பிரணாப் முகர்ஜி. அப்போது அவர் கூறுகையில், பாஜக ஊழலுக்காக போராடுவதாக கூறி நாடு தழுவிய போராட்டத்தை அறிவித்துள்ளது. எங்களுக்கும் ஊழலை ஒழிப்பதில் அக்கறை உள்ளது. நாங்களும் ஊழலுக்கு எதிராக பல்வேறு நடவடிக்கைகளை எடுத்து வருகிறோம்.

அரசின் நடவடிக்கைகளை விளக்கவும், பாஜக போன்றோரின் விஷமப் பிரசாரத்தை முறியடிக்கவும் காங்கிரஸ் சார்பில் நாடு தழுவிய பிரசார போராட்டம் நடத்தப்படும்.

சமீபத்தில் நடந்த சட்டசபைத் தேர்தல்களில் பாஜக படு தோல்வியைச் சந்தித்தது. இதிலிருந்து மக்களை திசை திருப்பவும், மறைமுகமாக பிறருடைய ஆதரவின் பலனை தாங்கள் அடையும் முயற்சியாகத்தான் அன்னா ஹஸாரே, ராம்தேவ் போன்றோருக்கு ஆதரவாக நடப்பதாக காட்டிக் கொள்கிறது பாஜக.

இதன் பொருட்டே அது இவர்களுக்கு ஆதரவு அளிக்கிறது. இது அரசியல் சட்டத்திற்கு விரோதமான செயலாகும்.

அன்னா ஹஸாரே, ராம்தேவ் போன்றோரின் செயல்களும் அரசியல் சட்டத்திற்கு விரோதமானது, சட்ட விரோதமானவை. நாடாளுமன்றம் மற்றும் மாநில சட்டசபைகளுக்குத்தான் அரசியல் சட்டம் அதிகாரத்தை அளித்துள்ளது. மாறாக, 5000 பேர் கூடி, 10,000 பேர் கூடி இதைச் செய், அதைச் செய் என்று அரசுக்கு கட்டளையிட முடியாது. இப்படிச் சொல்வது ஜனநாயகத்தை பலவீனமாக்கி விடும் என்றார் பிரணாப் முகர்ஜி.

பிரணாப் முகர்ஜி அறிவித்துள்ள காங்கிரஸ் கட்சியின் போராட்டம் ஹஸாரே, ராம்தேவ் மற்றும் பாஜகவுக்கு எதிரான போராட்டமாக பார்க்கப்படுகிறது.

English summary

Senior Congress leader and Finance Minister Pranab Mukherjee today hit out at Anna Hazare and Ramdev over the civil society's anti-corruption movement, accusing them of undermining democratic institutions and did not spare the BJP either. Mukherjee while announcing Congress' plans to launch a nationwide anti-corruption campaign took on BJP saying it was backing Hazare and Ramdev to gain support of people after its debacle in the recent Assembly polls and accused the party of providing "logistical support" to their agitations and resorting to "unconstitutional practice".