தீபாவளி முன்பதிவு: தென்மாவட்ட ரயில்கள் 10 நிமிடத்தில் ஹவுஸ்புல்

நெல்லை: தீபாவளி பண்டிகையை முன்னிட்டு தென்மாவட்ட ரயில்களுக்கான முன்பதிவு துவங்கிய 10 நிமிடங்களில் முடிந்து விடுகிறது.

தீபாவளி, பொங்கல் பண்டிகை நாட்களில் தென்மாவட்ட ரயில்களுக்கான டிக்கெட் முன்பதிவு துவங்கிய 10 நிமிடங்களில் முடிந்து விடும். புரோக்கர்கள் மற்றும் டிக்கெட் ஏஜென்சியை சேர்ந்தவர்கள் முதல் நாள் இரவே வரிசையில் நின்று முன்பதிவு டிக்கெட்டுகளை பெறுவது வழக்கம்.

இந்தாண்டு தீபாவளி பண்டிகை வரும் அக்டோபர் மாதம் 26-ம் தேதி கொண்டாடப்படுகிறது. இதையொட்டி ரயில்களில் முன்பதிவு நேற்று முன்தினம் முதல் துவங்கியது. அக்டோபர் 22-ம் தேதி பயணத்திற்கு நேற்று முன்பதிவு நடந்தது.

இதற்காக பலர் நேற்று முன்தினம் இரவே நெல்லை ரயில் நிலையத்திற்கு சென்று வரிசையில் காத்திருந்தனர்.

காலை 8 மணிக்கு முன்பதிவு துவங்கிய 10வது நிமிடத்தில் தென்மாவட்ட ரயில்களில் டிக்கெட் ஹவுஸ்புல் ஆயின. பொதுமக்கள் அதிகாலையிலேயே சென்று காத்திருந்தாலும் முதலில் காத்திருக்கும் 5 நபர்களுக்கு மட்டுமே முன்பதிவு டிக்கெட்டுகள் கிடைக்கின்றன.

பிற ரயில்களை விட நெல்லை, தூத்துக்குடி, கன்னியாகுமரி எக்ஸ்பிரஸ் ரயில்களில் முன்பதிவு டிக்கெட்டுகள் வேகமாக நிரம்புவதால் கடந்த இரு தினங்களாக பொதுமக்கள் ஏமாற்றுத்துடன் திரும்பி செல்கின்றனர். காத்திருப்போர் பட்டியலும் 200-ஐ தாண்டிச் செல்வதால் தீபாவளிக்கு ரயில் பயணம் என்பது பலருக்கு பகல் கனவாகவே உள்ளது.

English summary

Train ticket booking for Diwali is going on from july 23. Southern district train tickets are getting sold in just 10 minutes. The waiting list has crossed 200.