கச்சா எண்ணெய் விலை 8 டாலர் குறைந்தது... பெட்ரோல் விலையைக் குறைப்பார்களா?

டெல்லி: சர்வதேச சந்தையில் கச்சா எண்ணெயின் விலை சரிந்துள்ளதால் பெட்ரோல் விலை லிட்டருக்கு 80 பைசா முதல் 1 ரூபாய் வரை குறையும் என்று எதிர்பார்க்கப்படுகிறது.

டிசம்பர் மாத விநியோகத்துக்கான தொகுப்பில் இந்தியா பெறவிருக்கும் கச்சா எண்ணெய் விலை குறிப்பிடத்தக்க அளவுக்குச் சரிந்துள்ளது. இதனால், சர்வதேச சந்தையில் ஒரு பீப்பாய் பெட்ரோல் 123 அமெரிக்க டாலர் என்கிற விலையிலிருந்து 115 டாலர்களாகக் குறைந்துள்ளது.

இதே நிலை நீடித்தால் அடுத்த வாரத்தில் இந்தியாவில் பெட்ரோல் விலை வரிகள் நீங்கலாக லிட்டருக்கு 80 பைசா முதல் 1 ரூபாய் வரை குறையும் என்று எண்ணெய் நிறுவன அதிகாரிகள் கூறியுள்ளனர்.

ஆனால் இது நடக்க வேண்டும் என்றால் டாலருக்கு நிகரான ரூபாயின் மதிப்பு மேலும் குறையாமல் இருக்க வேண்டும். ஆனால் இதற்கு வாய்ப்பு உள்ளதா தெரியவில்லை.

பெட்ரோல் விலை குறைக்கப்பட்டால், 2009-ம் ஆண்டு ஜனவரிக்குப் பிறகு அறிவிக்கப்படும் முதல் பெட்ரோல் விலைக்குறைப்பு இதுவாகத்தான் இருக்கும்.

பெட்ரோல் விலையை உயர்த்தும்போது மட்டும் இந்த விஷயங்கள் எதையும் அரசு கணக்கில் கொள்வதில்லை. சொல்லாமல் கொள்ளாமல் நள்ளிரவில் சட்டென்று ஏற்றிவிடுகிறார்கள். ஆனால் விலைக் குறைப்பு என்று வரும்போது, அதையும் பைசா கணக்கில் குறைக்கவே பல நாட்கள் யோசிக்க ஆரம்பித்துவிடுகின்றன எண்ணெய் நிறுவனங்கள்!

English summary

The oil market conditions forced the oil companies to think about the reduction of petrol prices in the coming days.