கரைகிறது 'கேஸ்'-கவலையில் இல்லத்தரசிகள்: 'இன்டக்ஷன்' ஸ்டவ்களுக்கு திடீர் மவுசு!

Published: Thursday, January 19, 2012, 11:31 [IST]

Subscribe to Oneindia Tamil

சென்னை: சமையல் எரிவாயு பிரச்சினை அடிக்கடி வலுத்து வருவதாலும், கேஸ் சிலிண்டர்கள் கிடைக்காத நிலை தொடர் கதையாகி வருவதாலும் இல்லத்தரசிகள் பெரும் அவஸ்தைக்குள்ளாகியுள்ளனர். இதனால் இன்டக்ஷன் ஸ்டவ் எனப்படும் எலக்ட்ரிக் ஸ்டவ்கள் மீது மக்களின் பார்வை படு வேகமாக திரும்ப ஆரம்பித்துள்ளது.

சமீப காலமாக கேஸ் சிலிண்டர்கள் கிடைப்பது குதிரைக் கொம்பாகி வருகிறது. குறிப்பாக கடந்த 3 வருடங்களாகவே இந்தப் பிரச்சினை அதிகமாக உள்ளது. முன்பெல்லாம் சிலிண்டர் தேவை என்று போன் செய்தால் போதும் அடுத்த நாளே கொண்டு வந்து வைத்து விடுவார்கள். ஆனால் இன்று அப்படி இல்லை. குறைந்தது ஒரு மாதமாகிறது. பல இடங்களில் அதையும் தாண்டி 45 நாட்கள் வரைக்கும் இழுத்து விடுகிறார்கள்.

கேட்டால், பற்றாக்குறை நிலவுகிறது, லாரி ஸ்டிரைக் என்று ஏதாவது ஒரு காரணத்தைப் பதிலாக தருகிறார்கள். தற்போதும் கூட எல்பிஜி டேங்கர் லாரிகள் ஸ்டிரைக் நடந்து வருவதால், கேஸ் சிலிண்டர் பற்றாக்குறை ஏற்படத் தொடங்கியுள்ளது.

ஸ்டிரைக் தொடங்குவதற்கு முன்பு புக் செய்தவர்களுக்கு சிலிண்டர் கிடைக்கவே 30 நாட்கள் வரை ஆகும் என்ற நிலையில் தற்போது அது மேலும் தள்ளிப் போகும் வாய்ப்பு உருவாகியுள்ளது. அதேசமயம், புதிதாக புக் செய்தவர்களுக்கு 2 மாதம் கூட ஆகலாம் என்ற அவல நிலை.

அனைத்து சிலிண்டர் நிரப்பும் மையங்களிலும், எரிவாயு காலியாகி விட்டது. தமிழ்நாடு, கேரளா, கர்நாடகா மற்றும் புதுவை ஆகிய மாநிலங்களுக்கு, தினமும், 20 லட்சம் சிலிண்டர்களுக்கு, டேங்கர் லாரிகளில் எரிவாயு வரும். ஆனால், ஏழாவது நாளாக போராட்டம் தொடர்வதால், 1.40 கோடி சிலிண்டர்களுக்கான எரிவாயு வரவில்லை.

நேற்று வரை தமிழகம் முழுவதும் கிட்டதக்தட்ட 30 லட்சம் சிலிண்டர்களுக்கு முன்பதிவாகியுள்ளதாம். ஆனால் எப்போது சிலிண்டர் தருவார்கள் என்பது தெரியவில்லை.

நாளை முதல் தமிழகத்தில் சிலிண்டர் விநியோகம் இருக்க வாய்ப்பில்லை என்று கூறி மக்களின் வயிற்றில் குறிப்பாக இல்லதரசிகளின் வயிற்றில் புளியைக் கரைத்துள்ளனர்.

தமிழகம் முழுவதும் இன்னும் 2 நாளில் முழுமையாக கேஸ் சிலிண்டர்கள் நின்று போகும் என்றும் கூறுகிறார்கள்.

இப்படி அடிக்கடி சிலிண்டர் பிரச்சினை வெடித்து வருவதால் மக்கள் பெரும் அதிருப்திக்குள்ளாகியுள்ளனர். இதனால் இன்டக்ஷன் ஸ்டவ் எனப்படும் எலக்ட்ரிக் ஸ்டவ்கள் மீது மக்களின் கவனம் திரும்பியுள்ளது. அதை வாங்கும் மக்கள் அதிகரித்து வருவதாக இன்டக்ஷன் ஸ்டவ் விற்பனையாளர்கள் மகிழ்ச்சி பொங்க தெரிவிக்கின்றனர்.

எதை எதையோ இலவசமாக தரும் அரசியல் கட்சிகள் இன்டக்ஷன் ஸ்டவ்வை இலவசமாக கொடுத்தால் அடுத்த எலக்ஷனில் அந்தக் கட்சிக்குத்தான் இல்லத்தரசிகள் வாக்களிப்பார்கள் என்று அடித்துச் சொல்லலாம்.அந்த அளவுக்கு 'கேஸ்' பிரச்சினை பெரிதாக உள்ளது தமிழகத்தில்.

Published On January 19, 2012