ராணுவ தளபதியின் பிறந்த ஆண்டைத் திருத்த மத்திய அரசு உத்தரவு-மோதல் வலுக்கிறது

டெல்லி: ராணுவத் தலைமைத் தளபதி வி.கே.சிங்கின் பிறந்த ஆண்டை 1950 என்று திருத்தம் செய்யுமாறு ராணுவ தலைமை அலுவலகத்திற்கு மத்திய பாதுகாப்பு அமைச்சகம் உத்தரவிட்டுள்ளது. இதன் மூலம் ராணுவத் தளபதியுடன் சமரசமாகப் போவதில்லை என்ற முடிவில் மத்திய அரசு உறுதியாக இருப்பது தெரிய வந்துள்ளது.

இந்திய ராணுவத்தில் பணியாற்றும் வீரர்களின் ஊதியம், ஓய்வூதியம் தொடர்பான ஆவணங்களை துணை ராணுவ தளபதி அலுவலகம் பராமரிக்கிறது. வீரர்களின் பணித் தகுதி, பதவி உயர்வு ஆகியவை தொடர்பான ஆவணங்களை ராணுவ செயலகப் பிரிவு பராமரிக்கிறது. இந்த இரண்டு அலுவலகங்களிலும் தலைமைத் தளபதி வி.கே. சிங்கின் பிறந்த தேதியில் முரண்பட்ட தகவல்கள் உள்ளன. துணை ராணுவ தளபதி அலுவலக ஆவணத்தில் அவர் 1951-ல் பிறந்தார் என்றும் ராணுவ செயலகப் பிரிவு ஆவணத்தில் 1950-ல் பிறந்தார் என்றும் குறிப்பிடப்பட்டுள்ளன.

இந்த விவகாரம் தொடர்பாக வி.கே.சிங் உச்ச நீதிமன்றத்தில் வழக்குத் தொடர்ந்திருப்பதால் அவருடன் சுமுகமாகச் செல்வதை மத்திய அரசு விரும்பவில்லை. இந்தப் பிரச்னையை சட்டரீதியாக எதிர்கொள்ளவும் அரசு இப்போது தயாராகி வருகிறது.

இதற்காக துணை ராணுவ தளபதி அலுவலக ஆவணங்களில் தலைமைத் தளபதியின் பிறந்த ஆண்டை 1950 ஆக திருத்தம் செய்யுமாறு அந்த அலுவலகத்துக்கு மத்திய பாதுகாப்பு அமைச்சகம் கடந்த வாரம் கடிதம் அனுப்பியுள்ளது.

கடந்த ஆண்டு ஜூலையிலேயே, தளபதியின் பிறந்த ஆண்டை 1950 ஆக திருத்துமாறு மத்திய பாதுகாப்பு அமைச்சகம் உத்தரவிட்டது. ஆனால், துணை ராணுவ தளபதி அலுவலகம் அதற்கான நடவடிக்கையை எடுக்கவில்லை.

தளபதியின் பள்ளிச் சான்றிதழில் அவரது பிறந்த ஆண்டு 1951 என்றே குறிப்பிடப்பட்டுள்ளது. அதனையும் அமைச்சகம் கருத்தில் கொள்ள வேண்டும் என்று ராணுவ அலுவலகம் சார்பில் தெரிவிக்கப்பட்டது.

இந் நிலையில், இதே விவகாரம் தொடர்பாக மத்திய அரசு மீண்டும் கடிதம் எழுதியுள்ளது. இதனால் வி.கே.சிங்குடன் சமரசமாகப் போவதில்லை என்று மத்திய அரசு உறுதியுடன் இருப்பது தெரிய வந்துள்ளது.

English summary

With less than a week to go before a Supreme Court hearing on Army chief General VK Singh's petition against the government's refusal to change his year of birth in its records, there is a fresh setback for him. The Ministry of Defence has written to the Army's official record keeper, the Adjutant General's branch, asking it to reconcile its records. According to the Army's records, General Singh's year of birth is 1951.