பேரறிவாளன் உள்ளிட்டோரின் தூக்கு ரத்து தொடர்பான வழக்கு-விசாரணை மார்ச் 27-க்கு ஒத்திவைப்பு

சென்னை: முன்னாள் பிரதமர் ராஜீவ் காந்தி கொலை வழக்கில் விதிக்கப்பட்ட தூக்குத் தண்டனையை ரத்து செய்யக் கோரி பேரறிவாளன் உள்ளிட்ட மூவரின் மனுக்கள் மீதான விசாரணையை மார்ச் 27-ந் தேதிக்கு சென்னை உயர்நீதிமன்றம் ஒத்திவைத்துள்ளது.

தங்களுக்கு விதிக்கப்பட்ட தூக்கை ஆயுள் தண்டனையாகக் குறைக்கக் கோரி குடியரசுத் தலைவருக்கு அனுப்பிய கருணை மனுவை 11 ஆண்டுகள் கழித்து நிராகரித்தது சட்டவிரோதமானது என்பதால் தூக்கை ரத்து செய்ய வேண்டும் என்பது மூவரின் கோரிக்கை.

மூவரின் மனுவை விசாரித்த சென்னை உயர்நீதிமன்றம் கடந்த ஆகஸ்ட் 30-ந் தேதியன்று தூக்கு தண்டனைக்கு இடைக்காலத் தடை விதித்தது.

இந்நிலையில் மூவரின் மனு சென்னை உயர்நீதிமன்றத்தில் இன்று விசாரணைக்கு வந்தது.

மூவரின் தூக்கு தண்டனை தொடர்பான வழக்கை வேறு மாநிலத்துக்கு மாற்ற வேண்டும் என்று மூப்பனார் பேரவை உச்சநீதிமன்றத்தில் தாக்கல் செய்துள்ள வழக்கு நிலுவையில் இருப்பதால் வழக்கின் விசாரணையை மார்ச் 27-ந் தேதிக்கு சென்னை உயர்நீதிமன்றம் ஒத்திவைத்தது,

உச்சநீதிமன்றத்தில் மூவரின் தூக்கு தொடர்பான வழக்கு விசாரணை பிப்ரவரி 22-ந் தேதி நடைபெற உள்ளது.

English summary

The Madras High Court adjourned till March 27 the hearing on the petitions by the three men convicted for assassinating former Prime Minister Rajiv Gandhi to commute their death sentences, while the Tamil Nadu government filed an additional affidavit in support of their pleas.