பால் விலை, பஸ் கட்டண உயர்வைப் பாராட்டி சங்கரன்கோவிலில் பிரசாரம்..கருணாநிதி கிண்டல்
செய்தியாளர்களிடம் இதுகுறித்து கருணாநிதி இன்று அளித்த பேட்டி விவரம்:
கேள்வி: சங்கரன்கோவில் தொகுதி இடைத்தேர்தலில் எதை முன் வைத்து பிரச்சாரம் மேற்கொள்ளப் போகிறீர்கள்?
கருணாநிதி: எங்கள் வேட்பாளர் வெற்றிபெற வேண்டுமென்பதை முன்வைத்து பிரச்சாரம் மேற்கொள்வோம்.
கேள்வி: அ.தி.மு.க. அரசு பொறுப்பேற்ற பின்பு, தி.மு.க. ஆட்சியில் தொடங்கப்பட்டுள்ள திட்டங்களையெல்லாம் ரத்து செய்துள்ளதே - மேலும், மின்வெட்டு, பால் விலை உயர்வு - பஸ் கட்டணம் உயர்வு இவற்றையெல்லாம் முன்வைத்து பிரச்சாரம் செய்வீர்களா?
கருணாநிதி: அவற்றையெல்லாம் பாராட்டுவோம். பேருந்து கட்டண உயர்வு - தலைமைச் செயலக மாற்றம் - அண்ணா நூற்றாண்டு நூலக மாற்றம் இவைகளையெல்லாம் பாராட்டி, தேர்தலில் பிரச்சாரம் செய்வோம்.
கேள்வி: அ.தி.மு.க. ஆட்சியில் பால் விலை உயர்த்தினாலும் - பேருந்து கட்டணைத்தை உயர்த்தினாலும் - மின்சார கட்டணம் உயர்த்தப்பட்டாலும் நடைபெறவுள்ள இடைத்தேர்தலில் அ.தி.மு.க.தான் வெற்றி பெறும் என்று ஜெயலலிதா சட்டப்பேரவையிலேயே சொல்லியிருக்கிறாரே. எனவே அதிமுக வெற்றியைத் தடுக்க தி.மு.க. சார்பில் பொது வேட்பாளர் நிறுத்தும் திட்டம் இருக்கிறதா?
கருணாநிதி: இந்த கேள்விக்கெல்லாம் பதில் சொல்ல விரும்பவில்லை.
கேள்வி: சட்டமன்ற எதிர்க்கட்சித் தலைவர் விஜயகாந்த் சஸ்பெண்ட் செய்துள்ளது பற்றி?
கருணாநிதி: ஜனநாயகத்திற்குப் புறம்பான காரியங்கள் மாத்திரமல்ல; ஜனநாயகத்தை உடைத்தெறியும் காரியங்கள், இந்த ஆட்சியில் தொடர்ந்து நடைபெறுகிறது. அதற்கு ஒரு உதாரணம், விஜயகாந்த் மீது செலுத்துகின்ற அடக்குமுறைகளும் - அட்டூழியங்களும்.
கேள்வி: ஏற்கனவே 1.10 கோடி உறுப்பினர்கள் தி.மு.க. உறுப்பினர்களாக இருக்கிறார்கள். புதிய உறுப்பினர் சேர்த்தலில் எண்ணிக்கை இலக்கு வைத்திருக்கிறீர்களா?
கருணாநிதி: ஏற்கனவே இருக்கின்ற உறுப்பினர்கள் எண்ணிக்கையை தாண்டுகின்ற அளவிற்கு இருக்கும் என்றார் கருணாநிதி.
Click it and Unblock the Notifications
Sign in with Google