தமிழக சட்டசபை பட்ஜெட் கூட்டத் தொடர் ஒரு நாள் நீட்டிப்பு
சென்னை: தமிழக சட்டசபையின் பட்ஜெட் கூட்டத் தொடர் மேலும் ஒரு நாள் நீட்டிக்கப்பட்டுள்ளது. இந்தக் கூட்டத் தொடர் மே மாதம் 12ம் தேதி வரை நடைபெறுகிறது.
பட்ஜெட் கூட்டத் தொடர் கடந்த மாதம் 26ம் தேதி தொடங்கி அன்று பட்ஜெட் தாக்கல் செய்யப்பட்டது. 27ம் தேதி விடுமுறைக்கு பிறகு 28ம் தேதி முதல் இம்மாதம் 4ம் தேதி வரையிலும் 5 நாட்கள் பட்ஜெட் மீதான பொது விவாதமும், நிதி அமைச்சரின் பதிலுரையும் இடம் பெற்றது.
கடந்த 2ம் தேதி இந்திய கம்யூனிஸ்ட் கட்சி உறுப்பினர் முத்துக்குமரன் மறைவுக்கு இரங்கல் தெரிவிக்கப்பட்டு அவை ஒத்தி வைக்கப்பட்டது.
இதனால் நேற்று அலுவல் ஆய்வுக்குழு மீண்டும் கூடி பேரவையின் நிகழ்ச்சிகளை இறுதி செய்தது.
அதன்படி மே மாதம் 12ம் தேதி வரை மானியக் கோரிக்கைகள் மீது விவாதம் நடத்த முடிவு செய்யப்பட்டுள்ளது. மொத்தம் 23 நாட்கள் பல்வேறு துறைகளின் மானியக் கோரிக்கைகள் மீது விவாதம் நடைபெறவுள்ளது.