ஜனாதிபதி தேர்தல்: பி.ஏ. சங்மாவுக்கு அதிமுக, பிஜேடி ஆதரவு

டெல்லி: ஜனாதிபதி தேர்தலில் முன்னாள் சபாநாயகர் பி.ஏ.சங்மா போட்டியிட்டால் அவருக்கு ஆதரவு தெரிவிப்பது என்று பிஜு ஜனதாதளமும், அதிமுகவும் முடிவு செய்துள்ளன.

ஜனாதிபதி தேர்தல் முன்பு எப்பொழுதும் இல்லாத அளவுக்கு இம்முறை முக்கியத்துவம் பெற்றுள்ளது. பல்வேறு கட்சிகள் தங்கள் வேட்பாளரை நிறுத்த முயல்வது தான் அதற்கு காரணம். ஜனாதிபதி வேட்பாளராக கடும் போட்டி நிலவுகிறது. ஒவ்வொரு கட்சியும் ஒவ்வொருவரின் பெயரைக் கூறி அவருக்கு ஆதரவு அளிப்பதாகத் தெரிவித்து வருகின்றன.

இந்நிலையில் முன்னாள் ஜனாதிபதி அப்துல் கலாமுக்கு அதிமுக உள்ளிட்ட சில கட்சிகள் ஆதரவு தெரிவித்தன. மத்திய நிதியமைச்சர் பிரணாப் முகர்ஜிக்கு சிலர் ஆதரவு தெரிவித்தனர். முக்கிய எதிர்கட்சியான பாஜகவைச் சேர்ந்த மூத்த தலைவர் யஷ்வந்த சின்ஹா பிரணாப் தான் ஜனாதிபதி பதவிக்கு மிகவும் பொருத்தமானவர் என்று நாடாளுமன்றத்தில் புகழ்ந்தார்.

இதற்கிடையே முன்னாள் சபாநாயகர் பி.ஏ. சங்மா, தனது மகள் அகாதா சங்மா எம்.பி.யுடன் தமிழகம் வந்து நேற்று முன்தினம் முதல்வர் ஜெயலலிதாவை சந்தித்து பேசினார். அப்போது ஜனாதிபதி தேர்தலில் பழங்குடியினத்தைச் சேர்ந்த ஒருவரை வேட்பாளராக்க ஆதரவளிக்குமாறு அவர் கேட்டுக் கொண்டார் என்று கூறப்படுகிறது.

இந்நிலையில் பி.ஏ. சங்மா ஜனாதிபதி தேர்தலில் போட்டியிட்டால் அவருக்கு ஆதரவளிப்போம் என்று பிஜு ஜனதாதள தலைவரும், ஒரிசா முதல்வருமான நவீன் பட்நாயக் அறிவித்துள்ளார். மேலும் சங்மாவுக்கு ஆதரவு கரம் நீட்ட அதிமுகவும் முன்வந்துள்ளது.

English summary

BJD and ADMK back former Loksabha speaker PA Sangma for president. PA Sangma along with his MP daughter Agatha Sangma met TN CM Jayalalithaa at the secretariat on may 15.