போலிச் சான்றிதழ் விவகாரம்: உடன்குடி பள்ளி தலைமை ஆசிரியர் உள்பட 3 பேர் மீது வழக்கு

தூத்துக்குடி: போலிச் சான்றிதழ் வழங்கிய விவகாரத்தில் உடன்குடி ஸ்ரீராமகிருஷ்ணா சிதம்பரேஸ்வரர் மேல்நிலைப்பள்ளி தலைமை ஆசிரியர், செயலாளர் உள்பட 3 பேர் மீது போலீசார் வழக்குப் பதிவு செய்துள்ளனர்.

தூத்துக்குடி மாவட்டம் உடன்குடி தேரியூர் ஸ்ரீராம்கிருஷ்ணர் சிதம்பரேஸ்வரர் மேல்நிலைப்பள்ளியில் ஜெயா என்ற பெண் எழுத்தராக பணி புரிந்தார். ஆனல் அவர் அந்த பள்ளியில் ஆசிரியராக பணியாற்றியதாக பள்ளி நிர்வாகத்திடம் இருந்து போலிச் சான்றிதழ் பெற்று கடந்த 2006ம் ஆண்டு தமிழ்நாடு திறந்த நிலை பல்கலைக்கழகம் நடத்திய ஆசிரியர் நுழைவுத் தேர்வை எழுதினார். இது தொடர்பாக உடன்குடி அருகே உள்ள சுந்தரபுரத்தைச் சேர்ந்த சுடலைமணி என்பவர் மதுரை உயர் நீதிமன்ற கிளையில் வழக்கு தொடர்ந்தார். இதனை விசாரித்த நீதிபதிகள் மூன்று வார காலத்திற்குள் உரிய நடவடிக்கை எடுக்குமாறு தூத்துக்குடி எஸ்.பி. மற்றும் குலசேகரபட்டணம் இன்ஸ்பெக்டர் ஆகியோருக்கு உத்தரவிட்டனர்.

ஆனால் 7 ஆண்டுகள் ஆகியும் போலீசார் எவ்வித நடவடிக்கையும் எடுக்காததால் சுடலைமணி திருச்செந்தூர் நீதிமன்றத்தில் மதுரை உயர் நீதிமன்ற கிளையின் உத்தரவை மேற்கோள் காட்டி வழக்கறிஞர் ஜேசுராஜ் என்பவர் மூலம் மனு தாக்கல் செய்தார். அந்த மனுவில், உடன்குடி ராமகிருஷ்ணா சிதம்பரேஸ்வரர் மேல்நிலைப்பள்ளியில் வழங்கப்பட்ட போலிச் சான்றிதழ் தொடர்பாக தொடரப்பட்ட வழக்கில் மதுரை உயர் நீதிமன்ற கிளை உத்தரவை 7 ஆண்டுகள் ஆகியும் போலீசார் செயல்படுத்தவில்லை. எனவே, இது குறித்து உரிய நடவடிக்கை எடுக்க வேண்டும் என்று தெரிவித்திருந்தார்.

இதனை விசாரித்த நீதிமன்றம் சம்பந்தப்பட்டவர்கள் மீது வழக்குப் பதிவு செய்து விசாரணை நடத்துமாறு குலசேகரப்பட்டிணம் போலீசாருக்கு கடந்த மே மாதம் 17ம் தேதி உத்தரவிட்டது. இதன் அடிப்படையில் உடன்குடி தேரியூர் ராமகிருஷ்ணா சிதம்பரேஸ்வரர் மேல்நிலைப்பள்ளி செயலாளர் திவ்யானந்தா, தலைமை ஆசிரியர் சபாபதி மற்றும் போலிச் சான்று பெற்றதாக கூறப்படும் பெண் ஜெயா ஆகியோர் மீது குலசேகரபட்டிணம் இன்ஸ்பெக்டர் சிவகுமார் வழக்குப் பதிவு செய்து விசாரணை நடத்தி வருகிறார்.

English summary

Kulasekarapattinam police filed a case against Udangudi Sri Ramakrishna Chidambareswarar higher secondary school principal and 2 others for giving fake certificate to one of its former employee Jaya.