17-ம் தேதி மட்டும் பகல் நேரம் 36 மணி நேரமாக நீடிக்கும்?- பீதி கிளப்பும் எஸ்எம்எஸ்!
சென்னை: நேற்று முதல் முழுக்க முழுக்க அநியாயத்துக்கு ஒரு எஸ்எம்எஸ் மக்களை குழப்போ குழப்பென்று குழப்பி வருகிறது.
அதாவது வரும் அக்டோபர் 17-ம் தேதி மட்டும் 36 மணிநேரம், அதாவது ஒன்றரை நாள் தொடர்ந்து பகலாகவே இருக்கும். 2400 ஆண்டுகளுக்குப் பிறகு இந்த அரிய நிகழ்ச்சி நடக்கிறது - இதுதான் அந்த எஸ்எம்எஸ்!
வட-தென் துருவ பகுதிகளில் தான்...
இந்த எஸ்.எம்.எஸ். தகவலால் பெரும் பரபரப்பு ஏற்பட்டுள்ளது. இதுபற்றி சென்னை வானிலை மைய அதிகாரி ஒருவரிடம் கேட்டபோது, இந்தியாவைப் பொறுத்தவரை பகல் நேரம் ஒரு சில நாட்களில் மட்டுமே சில நிமிடங்கள் அல்லது ஒரு மணி நேரம் வேறுபடும்.
ஒவ்வொரு 12 மணி நேரமும் பகல்-இரவு என்று மாறி வரும். வட-தென் துருவ பகுதிகளில் தான் பகல்-இரவு நேரங்களில் மாறுபாடு ஏற்படும். இங்கு அதற்கான வாய்ப்பே இல்லை என்று மறுத்தார்.
ஜோதிடர் என்ன சொல்றார்?...
ஜோதிடர் ஒருவரிடம் கேட்டபோது, இப்படியெல்லாம் ஜோதிடத்தில் கூறப்படவே இல்லை. அதுவும் தொடர்ந்து 36 மணி நேரம் பகல் என்பது சாத்தியமில்லை என்றார்.
மேலும் ஏன் தான் இப்படி மக்களை குழப்புறாளோ என்றும் புலம்பினார். எதை வைத்து இப்படி எஸ்எம்எஸ் விட்டார்கள் என்று நம்மிடமே கேட்டார் கோபத்துடன்.
அப்படியெனில் அவர்கள் சும்மா இருப்பார்களா?
இதுகுறித்து பிஎம் பிர்லா கோளரங்கத்தில் விசாரித்தோம். அவர்கள் கூறுகையில், துருவப் பகுதியில் ஆண்டுக்கு இரு தினங்கள் இவ்வாறு தொடர்ந்து பகலாகவே நீடிப்பது சாத்தியம்தான்.
ஆனால் இந்தியா போன்ற பூமத்திய ரேகை நாடுகளில் இதெல்லாம் சாத்தியமில்லை. இந்தியாவில் 36 மணிநேரம் பகல் என்றால் அமெரிக்காவில்? 36 மணிநேரம் தொடர் இருள் சூழந்திருக்குமா... அப்படியெனில் அவர்கள் சும்மா இருப்பார்களா?, அதை பல ஆண்டுகளுக்கு முன்பே கணக்கிட்டு சொல்லியிருக்க மாட்டார்களா? என்றார்.
அதானே!
குறிப்பு: நான்காண்டுகளுக்கு முன்பும் இப்படியொரு வதந்தி வந்து மறைந்தது நினைவிருக்கலாம்.
Click it and Unblock the Notifications
Sign in with Google