தீபாவளிக்கு 6,859 சிறப்பு பேருந்துகளை இயக்குகிறது தமிழக அரசு

சென்னை: தீபாவளியை முன்னிட்டு சென்னையிலிருந்து பிற ஊர்களுக்கு 6,859 சிறப்புப் பேருந்துகளை தமிழக அரசு இயக்குகிறது.

6,859 பேருந்துகள்

இது தொடர்பாக தமிழக போக்குவரத்துத் துறை அமைச்சர் செந்தில் பாலாஜி வெளியிட்ட செய்திக் குறிப்பில், சென்னை கோயம்பேடு புறநகர் பேருந்து நிலையத்தில் இருந்து இம்மாதம் 9-ந் தேதி 768 பேருந்துகளும், 10-ந் தேதி 633 பேருந்துகளும், 11-ந் தேதி 543 பேருந்துகளும், 12-ந் தேதி 884 பேருந்துகளும் இயக்கப்பட உள்ளன. அதேபோல் சென்னையை தவிர்த்து மாநிலம் முழுவதிலும் இருந்து 9-ந் தேதி 925 பேருந்துகளும், 10-ந் தேதி 940 பேருந்துகளும், 11-ந் தேதி 977 பேருந்துகளும், 12-ந் தேதி 1189 பேருந்துகளும், ஆக மொத்தம் 9-ந் தேதி முதல் 12-ந் தேதி வரை 6,859 சிறப்புப் பேருந்துகள் இயக்கப்பட உள்ளன.

ஆன்லைன் முன்பதிவு

தீபாவளி முடிந்த பின்பு, பொதுமக்கள் மீண்டும் ஊர் திரும்புவதற்கு வசதியாக இதே அளவிலான பேருந்துகள் 13-ந் தேதி முதல் 16-ந் தேதி வரை இயக்கப்பட உள்ளன. 300 கிலோ மீட்டர் தூரத்திற்கு மேல் செல்லும் சிறப்புப் பேருந்துகளுக்கு இணையதள பயணச் சீட்டு முன்பதிவு முறையில், (Online Ticket Reservation System) www.tnstc.in என்ற இணையதளம் மூலம், பயணச்சீட்டு முன்பதிவு செய்யும் வசதியும் செய்யப்பட்டு உள்ளது.

ஆம்னி பேருந்துகள் குறித்து புகார்...

தீபாவளி பண்டிகையையொட்டி அதிக கட்டணம் வசூலிக்கும் ஆம்னி பேருந்துகள் குறித்து சென்னை, கோயம்பேடு புறநகர் பேருந்து நிலையத்தில் உள்ள அரசு விரைவு போக்குவரத்துக் கழக அலுவலக தொலைபேசி எண்: 044-24794709க்கு பொதுமக்கள் புகார் தெரிவிக்கவும் ஏற்பாடுகள் செய்யப்பட்டு உள்ளன என்று அதில் கூறப்பட்டுள்ளது.

English summary

As Deepavali is coming closer, Tamil Nadu government is making arrangements for the convenience of passengers who are expected to travel in large numbers during the festival period. To provide with better facilities, the state government has decided to operate a total of 6,859 additional buses across the state four days before the festival from Nov 9 to 12.