ராஜினாமா செய்த 12 கர்நாடக பாஜக எம்.எல்.ஏ.க்கள் எதியுரப்பா கட்சியில் இணைந்தனர்
பெங்களூர்: கர்நாடகத்தில் தங்கள் பதவிகளை ராஜினாமா செய்த 12 பாஜக எம்.எல்.ஏ.க்கள் முன்னாள் முதல்வர் எதியூரப்பாவின் கர்நாடக ஜனதா கட்சியில் நேற்று இணைந்தனர்.
கர்நாடக முன்னாள் முதல்வர் எதியூரப்பா பாஜகவில் இருந்து வெளியேறி கர்நாடக ஜனதா கட்சியை துவங்கினர். இதையடுத்து அவருக்கு ஆதரவான 13 எம்.எல்.ஏ.க்கள் கடந்த 29ம் தேதி தங்கள் பதவிகளை ராஜினாமா செய்தனர். அதில் 12 பேரின் ராஜினாமா ஏற்றுக்கொள்ளப்பட்டது. இந்நிலையில் அந்த 12 பேரும் பாஜகவில் இருந்து விலகி எதியூரப்பா தலைமையில் நேற்று கர்நாடக ஜனதா கட்சியில் சேர்ந்தனர்.
அதன் பிறகு எதியூரப்பா செய்தியாளர்களிடம் கூறுகையில்,
முன்னாள் அமைச்சர்கள் ஷோபா கரந்தலஜே, சி.எம். உதாசி உள்ளிட்ட 12 பேர் பாஜகவில் இருந்து விலகி எங்கள் கட்சியில் சேர்ந்துள்ளனர். எம்.எல்.ஏ.க்கள் தங்கள் ராஜினாமா கடிதங்களை சமர்பித்த பிறகு அதை ஏற்காமல் சபாநாயகர் போப்பையா அவர்களை பள்ளி மாணவர்கள் போன்று நடத்தியுள்ளார். மேலும் சில எம்.எல்.ஏ.க்கள் ராஜினாமா செய்யக்கூடும் என்பதால் சபாநாயகர் வெளியூர் சென்றுவிட்டார்.
சபாநாயகர் பதவிக்கான கௌரவத்தை அவர் பாதுகாக்க வேண்டும். மேலும் பல எம்.எல்.ஏ.க்கள் ராஜினாமா கடிதங்களை சமர்பித்தால் அதை ஏற்றுக்கொள்ள வேண்டும். வரும் சட்டசபை தேர்தலில் கர்நாடக ஜனதா கட்சி தனித்துப் போட்டியிட்டு 224 தொகுதிகளிலும் வேட்பாளர்களை நிறுத்தும். அதிக இடங்களை கைப்பற்றி ஆட்சியைப் பிடிப்போம். வேட்பாளர்கள் பட்டியலை விரைவில் வெளியிடுவேன்.
முதல்வர் ஜெகதீஷ் ஷெட்டர் பட்ஜெட்டை தாக்கல் செய்வதில் எங்களுக்கு ஆட்சேபனை இல்லை. பட்ஜெட்டை தாக்கல் செய்வது, அரசை காப்பாற்றிக் கொள்வது ஆகியவை ஷெட்டர் கையில் தான் உள்ளது. நான் எந்த எம்.எல்.ஏ.வையும் ராஜினாமா செய்ய வற்புறுத்தவில்லை. கர்நாடக ஜனதா கட்சியை பலப்படுத்த மேலும் பல பாஜ பல எம்.எல்.ஏ.க்கள் பாஜகவில் இருந்து வந்தால் அவர்களை வரவேற்பேன் என்றார்.
தன்னை நீக்கியவரை நீக்கிய எதியூரப்பா:
முன்னதாக கர்நாடக ஜனதா கட்சியைத் துவங்கிய பிரசன்ன குமார் கட்சி தலைவர் பொறுப்பில் இருந்து எதியூரப்பாவை நீக்கி தேர்தல் ஆணையத்திற்கு கடிதம் அனுப்பினார். பதிலுக்கு பிரசன்ன குமாரை நீக்கி எதியூரப்பாவும் தேர்தல் ஆணையத்திற்கு கடிதம் அனுப்பினார். தேர்தல் ஆணையம் எதியூரப்பாவின் கடிதத்தை ஏற்றுக் கொண்டது.
இதற்கிடையே தேர்தல் நெருங்கி வருவதால் எதியூரப்பா மற்றும் அவரைச் சேர்ந்தவர்களுக்கு ஆதரவாக இருக்கும் ஐ.ஏ.எஸ்., ஐ.பி.எஸ். அதிகாரிகளை ஷெட்டர் இடமாற்றம் செய்து வருகிறார்.
Click it and Unblock the Notifications
Sign in with Google