வார்ட்டன் விவகாரம்: நியூயார்க்கில் மோடிக்கு ஆதரவாக பேரணி

By Siva

Updated: Monday, March 25, 2013, 18:46 [IST]

Subscribe to Oneindia Tamil

நியூயார்க்: வார்ட்டன் இந்தியா பொருளாதாரப் பெருமன்ற மாநாட்டில் குஜராத் முதல்வர் நரேந்திர மோடியை பேச அழைத்துவிட்டு பின்னர் பின்வாங்கியதை எதிர்த்து நியூயார்க்கில் கண்டன பேரணி நடத்தப்பட்டது.

வார்ட்டன் இந்தியா பொருளாதாரப் பெருமன்ற 2013 மாநாட்டில் உரை நிகழ்த்த குஜராத் முதல்வர் நரேந்திர மோடிக்கு அழைப்பு விடுக்கப்பட்டது. ஆனால் அவர் அங்கு உரை நிகழ்த்த பல்வேறு அமைப்புகள் கடும் எதிர்ப்பு தெரிவித்தன. 2002ம் ஆண்டு நடந்த குஜராத் கலவரத்தை கட்டுப்படுத்த தவறிய மோடி வார்ட்டன் மாநாட்டில் உரை நிகழ்த்த பெனிசில்வேனியா பல்கலைக்கழக மாணவர்கள் மற்றும் ஊழியர்கள் எதிர்ப்பு தெரிவித்து நிகழ்ச்சி ஏற்பாட்டாளர்களிடம் மனு கொடுத்தனர்.

இதையடுத்து அந்த அழைப்பு திரும்பப் பெறப்பட்டது. வார்ட்டனின் இந்த முடிவை இந்தியாவில் உள்ள முக்கிய அரசியல் கட்சிகளும், ஊடகங்களும் எதிர்த்தன. மேலும் வார்ட்டனில் உரை நிகழ்த்தவிருந்த சில இந்தியர்கள் மோடிக்கு ஆதரவு தெரிவிக்கும் வகையில் அந்த மாநாட்டில் பேசவில்லை.

மோடி உரை நிகழ்த்த அனுமதி மறுத்ததை எதிர்த்து நியூயார்க்கில் கடந்த சனிக்கிழமை 200 அமெரிக்கர்கள் கலந்து கொண்ட கண்டன பேரணி நடந்தது. அமெரிக்கன்ஸ் ஃபார் ஃப்ரீ ஸ்பீச் என்ற அமைப்பு இந்த பேரணியை நடத்தியது.