ஒபாமாக்களுக்கு வாயில் 'வாஸ்து' சரியில்லை... 'சிங்கிள் மதர்' என்று பேசி பீதி கிளப்பிய மிஷல்!

Updated: Sunday, April 7, 2013, 11:57 [IST]

Subscribe to Oneindia Tamil

வாஷிங்டன்: அமெரிக்க டிவிக்கு அளித்த பேட்டியின்போது தன்னை பிசியான, சிங்கிள் மதர் என்று மிஷல் ஒபாமா கூறியதால் சலசலப்பு ஏற்பட்டது. இருப்பினும் தான் கூறியது தவறு என்பதை உடனடியாக திருத்திக் கொண்டார் மிஷல்.

அதிபர் பராக் ஒபாமா, கலிபோர்னியா அட்டர்னி ஜெனரல் கமலா ஹாரிஸ் அழகாக இருப்பதாக பாராட்டிப் பேசி சர்ச்சையில் சிக்கினார். இதுதொடர்பாக கமலாவிடம் அவர் போனில் தொடர்பு கொண்டு வருத்தமும், மன்னிப்பும் கேட்டார்.

இதேபோல ஒபாமாவின் மனைவி மிஷலும் வாய்தவறிப் பேசி சலசலப்பை ஏற்படுத்தினார். சிபிஎஸ் தொலைக்காட்சிக்கு அவர் அளித்த பேட்டியின்போது தான் ஒரு பிசியான, சிங்கிள் மதர் என்று கூறியதால் சலசலப்பு ஏற்பட்டது.

இதுகுறித்து மிஷல் அளித்த பேட்டியின்போது, ஒரு பிசியான, சிங்கிள் மதராக இருக்கும்போது.. மன்னிக்கவும், நான் சிங்கிள் என்று சொல்லியிருக்கக் கூடாது. பிசியான தாயாக இருக்கும்போது, அதிலும் அதிபரின் மனைவியாக இருக்கும் பட்சத்தில், தனிமையான ஒரு உணர்வு ஏற்படுவது உண்மைதான். ஆனால் அந்த தனிமை உணர்வை எனது கணவர் போக்குகிறார். ஒரு தந்தையாக அவர் கை கொடுக்கிறார் என்றார் மிஷல்.

மிஷலுக்கும் சரி, ஒபாமாவுக்கும் சரி வாயில் சனி வந்து உட்கார்ந்துள்ளது போல.. பார்த்து இருந்து கொண்டால் நல்லது!