சிபிஎஸ்இ 10ம் வகுப்பு தேர்வு முடிவுகள் வெளியீடு: சென்னை மண்டலம் தான் பர்ஸ்ட்

டெல்லி: சிபிஎஸ்இ அனைத்து மண்டலங்களுக்கான பத்தாம் வகுப்பு தேர்வு முடிவுகள் இன்று வெளியாகியுள்ளது. இதில் சென்னை மண்டலத்தில் தான் அதிகமானோர் தேர்ச்சி பெற்றுள்ளனர்.

சிபிஎஸ்இ சென்னை மண்டலத்திற்கான பத்தாம் வகுப்பு தேர்வு முடிவுகள் கடந்த 26ம் தேதி வெளியானது. இந்நிலையில் இன்று அனைத்து மண்டலங்களுக்கான தேர்வு முடிவுகள் வெளியாகியுள்ளது. தேர்வு எழுதியவர்களில் 98.76 சதவீதம் பேர் தேர்ச்சி பெற்றுள்ளனர். இது கடந்த ஆண்டின் தேர்ச்சி விகிதத்தை விட சற்று அதிகம் ஆகும்.

இந்த ஆண்டும் வழக்கம் போல் மாணவர்களை விட மாணவிகளே அதிக அளவில் தேர்ச்சி பெற்றுள்ளனர். மாணவிகளின் தேர்ச்சி விகிதம் 98.94 சதவீதமாகவும், மாணவர்களின் விகிதம் 98.64 ஆகவும் உள்ளது. அனைத்து மண்டலங்களில் அஜ்மீர், அலகாபாத், புவனேஸ்வர், டெல்லி, குவாஹாத்தி, பஞ்ச்குலா மற்றும் பாட்னா ஆகியவை அடக்கம்.

இன்று வெளியான தேர்வு முடிவுகளுடன் ஒப்பிட்டுப் பார்க்கையில் சென்னை மண்டலத்தில் தான் தேர்ச்சி சதவீதம் அதிகம். அதாவது தேர்வு எழுதியவர்களில் 99.80 சதவீதம் பேர் தேர்ச்சி பெற்றுள்ளனர்.

தமிழ்நாடு, மகாராஷ்டிரா, ஆந்திரா, கர்நாடகா, கேரளா, கோவா, அந்தமான் மற்றும் நிகோபார் தீவுகள், லட்சத்தீவு, டாமன் அன்ட் டையு மற்றும் புதுவை ஆகியவை சென்னை மண்டலத்தில் அடக்கம் என்பது குறிப்பிடத்தக்கது.

English summary

The Central Board of Secondary Education today declared the Class X results which recorded a pass percentage of 98.76, a marginal increase over last year. Girls once again outshone boys in the results. The pass percentage of girls stood at 98.94 per cent as compared to 98.64 per cent of boys. According to a CBSE statement, the pass percentage in Chennai region at 99.80 was the highest in the country.